Hyrja në fuqi e marrëveshjes me EFTA-n, shans i artë për prodhuesit dhe eksportuesit kosovarë

Dhoma e Tregtisë dhe Industrisë Kosovë (DHTIK) ka përshëndetur zyrtarisht nisjen e zbatimit të Marrëveshjes së Tregtisë së Lirë mes Republikës së Kosovës dhe shteteve anëtare të EFTA-s, ku bëjnë pjesë Zvicra, Norvegjia, Islanda dhe Lihtenshtajni. Sipas vlerësimeve të kësaj dhome ekonomike, ky hap hap dyert për depërtimin e kompanive vendase në tregje ndërkombëtare, fuqizimin e fushës së eksporteve dhe stimulimin e prurjeve të reja të investimeve të huaja në vend. Në analizën e bërë nga DHTIK, bëhet e ditur se kjo marrëveshje vendos një bazë të qëndrueshme ligjore e tregtare, e cila përfshin shkëmbimin e mallrave e shërbimeve, thjeshtimin e procedurave doganore, përcaktimin e qartë të rregullave të origjinës dhe mbrojtjen e investimeve. Për më tepër, ky institucion i bën thirrje ekzekutivit dhe institucioneve qendrore që të ndërmarrin hapa të menjëhershëm për të ndihmuar sipërmarrjet vendase në ngritjen e niveleve prodhuese, gjetjen e hapësirave në tregjet e huaja dhe vendosjen e urave bashkëpunuese me partnerët nga hapësira e EFTA-s. Një theks i veçantë në reagim i është kushtuar domosdoshmërisë së thithjes së kapitalit nga mërgata jonë që jeton dhe vepron në këto shtete evropiane. “Diaspora jonë nuk duhet të shihet vetëm si burim i remitencave, por edhe si një urë lidhëse për kapital, investime, teknologji, njohuri dhe tregje të reja”, thuhet në reagimin e DHTIK-ut. Në fund, Dhoma e Tregtisë dhe Industrisë Kosovë ka kërkuar angazhim konkret për evidentimin e fushave që kanë potencial më të lartë eksporti, organizimin e takimeve direkte biznes-me-biznes (B2B) me homologët nga vendet e EFTA-s, si dhe ngritjen e standardeve të cilësisë dhe konkurrueshmërisë për mallrat dhe shërbimet e Kosovës.