Skandali i drogës në Turqi: Zbardhen rezultatet e testit të dy yjeve të kinematografisë, Afra Saraçoğlu dhe Aras Bulut İynemli

Janë publikuar rezultatet zyrtare të analizave toksikologjike për disa prej figurave më të njohura të skenës turke, të cilat u përfshinë në një hetim të gjerë antidrogë të udhëhequr nga Prokuroria e Përgjithshme e Bakırköy. Sipas të dhënave zyrtare, analiza e mostrave të flokëve të aktores së njohur Afra Saraçoğlu ka rezultuar pozitive për praninë e kokainës. Nga ana tjetër, testi i bashkëkolegut të saj, aktorit të mirënjohur Aras Bulut İynemli, ka dalë plotësisht negativ. Ekspertizën mjeko-ligjore e ka kryer Instituti i Mjekësisë Ligjore, ndërsa të dhënat janë bërë publike në kuadër të procedurave hetimore që po zhvillohen ndaj disa personazheve publike në vend. Në të njëjtën valë testimesh janë zbuluar edhe rezultatet për ish-futbollistin e njohur Hasan Şaş dhe gazetarin sportiv Yağız Sabuncuoğlu. Analizat e gjakut dhe urinës së Hasan Şaş kanë konfirmuar praninë e kokainës, ndërsa në mostrën e tij të flokëve janë zbuluar kokainë dhe kodeinë. Përkundër kësaj, testi i gazetarit Yağız Sabuncuoğlu ka rezultuar negativ. Aras Bulut İynemli ishte ndër personat e shoqëruar gjatë aksionit të ndërmarrë nga ekipet e Komandës së Xhandarmërisë së Stambollit. Aktori iu nënshtrua marrjes së mostrave të flokëve, gjakut dhe urinës në Institutin e Mjekësisë Ligjore, për t'u liruar më pas. Ndërkohë, në momentin e zhvillimit të operacionit, Afra Saraçoğlu ndodhej jashtë shtetit për arsye profesionale. Ajo u ndalua më 21 shtator në Aeroportin e Stambollit, menjëherë pas zbritjes nga fluturimi që e kthente nga Franca. Agjencia e menaxhimit të aktores sqaroi se Saraçoğlu u la e lirë pasi kaloi të gjitha procedurat e nevojshme në Institutin e Mjekësisë Ligjore dhe në organet e prokurorisë. Procedimi penal ndaj VIP-ave nisi me urdhër të Prokurorisë së Përgjithshme të Bakırköy. Më 18 shtator, strukturat e xhandarmërisë zhvilluan një aksion ku u ndaluan disa emra të njohur për publikun, mes të cilëve figura të tilla si aktori Aras Bulut İynemli, këngëtari i njohur me emrin artistik “Sefo” (Seyfullah Sağır), si dhe aktorja Melis Sezen.