Barazi në shpërblime: Sindikata e sektorit privat kërkon pagën e 13-të edhe për punëtorët e saj

Federata Sindikale e Punëtorëve Teknikë të Sektorit Privat të Kosovës (FSPTSPK) i ka drejtuar një kërkesë zyrtare Ekzekutivit të vendit, duke kërkuar që vendimi për pagën e 13-të të mos kufizohet vetëm te administratë publike, por të përfshijë edhe të punësuarit në sektorin privat. Reagimi i kësaj federate vjen menjëherë pas vendimit të fundit të Qeverisë për të ndarë pagën e 13-të ekskluzivisht për punonjësit e sektorit publik, duke lënë anësor një pjesë të madhe të fuqisë punëtore në vend. Përmes një komunikate zyrtare, FSPTSPK i ka bërë thirrje Qeverisë që të identifikojë mekanizmat dhe format e përshtatshme ligjore e financiare, në mënyrë që ky bonus të shtrihet njëkohësisht edhe për punëtorët e sektorit privat. „Në të kundërtën, ne, si Federatë Sindikale, do të përdorim të gjithë mekanizmat sindikalë që na garantohen me ligj, në mbrojtje të të drejtave dhe interesave të të punësuarve në sektorin privat. Punëtorët e këtij sektori nuk mund të trajtohen si qytetarë të dorës së dytë dhe të mbeten vazhdimisht jashtë përfitimeve që financohen edhe nga kontributi i tyre“, paralajmërohet në njoftimin e sindikatës. Në vijim të reagimit, është vënë në pah roli kyç që luan biznesi dhe puna e përditshme e këtij sektori, duke u cilësuar si një nga shtyllat kryesore të ekonomisë kombëtare dhe kontribuesi kryesor në arkën e shtetit përmes tatimeve. „Qeverisë dëshirojmë t’ia bëjmë të qartë se është pikërisht sektori privat ai i cili, me punën e tij, por edhe përmes taksave dhe tatimeve që paguan, kontribuon në rritjen e buxhetit. Me këto të hyra buxhetore, Qeveria financon pagën e 13-të për të punësuarit në sektorin publik, ndërsa punëtorët e sektorit privat, të cilët kontribuojnë në mbushjen e arkës së shtetit, mbeten jashtë këtij përfitimi“, theksohet tutje në dokument. Për ta shmangur një diskriminim të tillë ekonomik, FSPTSPK ka kërkuar nga autoritetet qeveritare që këtë çështje ta trajtojnë me prioritet dhe urgjencë institucionale, duke mundësuar përfshirjen e barabartë të të gjithë punëtorëve të sektorit privat në skemën e pagës së 13-të.