Mbledhja e 29 shtatorit: Këshilli Bashkiak i Tiranës i drejtohet SPAK-ut dhe Burgjeve për praninë e Erion Veliajt

Këshilli Bashkiak i Tiranës ka ndërmarrë një hap zyrtar duke i kërkuar Prokurorisë së Posaçme (SPAK) dhe Drejtorisë së Përgjithshme të Burgjeve që të garantojnë pjesëmarrjen e kryebashkiakut Erion Veliaj në seancën e radhës të parashikuar për datën 29 shtator 2026, në orën 15:00. Në shkresën e dërguar institucioneve kompetente, Këshilli kërkon që Veliajt t'i jepet mundësia e një lejeje të përkohshme për të marrë pjesë fizikisht në mbledhje, ose në rast se kjo masë nuk mund të zbatohet, të sigurohet lidhja e tij online përmes një videokonference. Nevojshmëria e pranisë së kryetarit lidhet ngushtë me domosdoshmërinë e shqyrtimit të çështjeve kyçe që i përkasin administrimit të kryeqytetit, si dhe diskutimit të projektligjit për ndarjen administrativo-territoriale. Këshilli ka kërkuar prej autoriteteve një përgjigje me shkrif rreth vendimmarrjes së tyre. “Këshilli Bashkiak do të mblidhet ditën e martë, datë 29 shtator 2026, ora 15:00, në sallën e Këshillit Bashkiak, për shqyrtimin, mes të tjerave, edhe të pikës 11 të rendit të ditës, ku detyrimi për t’u shprehur me një qëndrim zyrtar ndaj projektligjit “Për ndarjen administrativo-territoriale të njësive të qeverisjes vendore në Republikën e Shqipërisë”, i takon si Kryetarit të Bashkisë Tiranë, ashtu edhe Këshillit Bashkiak të Tiranës,” thuhet në dokument. Sakaq, në kërkesë citohet edhe vendimi i Gjykatës Kushtetuese nr. 66, datë 03.11.2025, duke theksuar se pjesëmarrja e kreut të Bashkisë përbën një të drejtë funksionale të mbrojtur me ligj, e cila është e domosdoshme për prezantimin e drafteve, buxhetit, raporteve vjetore dhe çështjeve të tjera që prekin vetëqeverisjen vendore. Për këtë arsye, institucioneve u kërkohet vlerësimi i lejimit të përkohshëm për prani fizike, apo mundësimi i komunikimit online. Në përmbyllje të shkresës, Këshilli Bashkiak shpreh gatishmërinë e plotë për të bashkëpunuar lidhur me çdo kërkesë sigurie, protokollare apo logjistike, me qëllim që procesi të jetë sa më transparent, ligjor dhe funksional, duke kërkuar njëkohësisht njoftim me shkrim për të respektuar funksionet institucionale dhe të drejtën e kryebashkiakut për të raportuar.