Bedri Hamza pas takimit me veteranët e UÇK-së: Bashkë kundër çdo padrejtësie ndaj historisë sonë

Kryetari i Partisë Demokratike të Kosovës, Bedri Hamza, ka zhvilluar një takim pune me krerët e Organizatës së Veteranëve të Luftës së Ushtrisë Çlirimtare të Kosovës. Gjatë këtij takimi, fokusi i bisedimeve ka qenë te sfidat aktuale me të cilat po ballafaqohet shteti dhe shoqëria. Kreu i PDK-së theksoi domosdoshmërinë e mbrojtjes së dinjitetit njerëzor e kombëtar, si dhe ruajtjen e pastërtisë së të vërtetës historike për luftën çlirimtare dhe vlerat e larta për të cilat u flijuan gjenerata të tëra. “Veteranët e UÇK-së bartin mbi supe pjesën më të rëndësishme të historisë së vendit tonë. Ata qëndruan në ditët më të vështira dhe sakrifikuan për lirinë”, ka shkruar Hamza në faqen e tij. Më tej, ai ka njoftuar opinionin publik se më 1 tetor, duke filluar nga ora 16:00, në sheshin “Skënderbeu” në Prishtinë, do të marrë pjesë në tubimin protestues të paralajmëruar. Në këtë ngjarje publike pritet të bashkohen veteranët, studentët dhe qytetarë të shumtë. “Të gjithë bashkë kundër padrejtësisë!”, ka përfunduar mesazhi i tij drejtuar publikut.