Skema e fajdesë në Rahovec: Prokuroria kërkon paraburgim për dy të dyshuar

Prokuroria Themelore në Gjakovë, përkatësisht Departamenti i Përgjithshëm, ka ndërmarrë hapa ligjorë duke nxjerrë Aktvendim për nisjen e hetimeve dhe duke i paraqitur Gjykatës Themelore në Gjakovë – Dega Rahovec, kërkesën zyrtare për caktimin e masës së paraburgimit prej 30 ditësh ndaj dy të pandehurve me inicialet S.S. dhe J.N. Sipas dosjes së prokurorisë, ekziston dyshimi i bazuar se të dy të dyshuarit, duke vepruar me dashje dhe në bashkëkryerje që nga muaji gusht i vitit 2026 e në vazhdimësi në territorin e Rahovecit, kanë shfrytëzuar gjendjen e rëndë financiare të viktimës E.A. Me qëllim të përfitimit të kundërligjshëm pasuror, ata dyshohet se kanë kontraktuar shuma joproporcionale parash në këmbim të një borxhi. Në bazë të hetimeve, i dëmtuari E.A., për shkak të ngushticës financiare, fillimisht kishte marrë një hua prej 1,000 eurosh nga i pandehuri S.S. Megjithatë, atij i ishte kërkuar fillimisht kthimi i 3,000 eurove, më pas shuma ishte rritur në 5,000 euro, për të arritur në fund në shifrën prej 8,000 eurosh. Kjo kishte ndodhur nën presionin e vazhdueshëm dhe kërcënimet se në rast mospagimi, ai do të detyrohej të dorëzonte automjetin e familjes. Ngjarja ka marrë kthesë më 24 shtator 2026, kur i dëmtuari është takuar me S.S. për t'i dorëzuar shumën prej 8,000 eurosh. Në vendngjarje është shfaqur edhe i pandehuri J.N., i cili pasi ishte koordinuar paraprakisht me S.S., i ka deklaruar viktimës se 500 euro nga borxhi ishin pjesë e tija dhe se tashmë detyrimi total mbetej 8,000 euro për shkak të rritjes së kamatës. Arrestimi i dy të dyshuarve është realizuar në flagrancë nga ana e zyrtarëve policorë, gjatë operacionit të udhëhequr nga Prokurori i Shtetit përmes masave të veçanta hetimore dhe bashkëpunimit të ngushtë me Policinë e Kosovës. Ata janë kapur pikërisht në momentin e pranimit të parave nga i dëmtuari E.A. Me këto veprime, të pandehurit S.S. dhe J.N. dyshohen se kanë përmbushur elementet e veprës penale “Fajdeja”, e parashikuar nga neni 331, paragrafi 1, lidhur me nenin 31 të Kodit Penal të Republikës së Kosovës (KPRK). Po ashtu, gjatë kontrollit të ushtruar në banesën e të pandehurit S.S., autoritetet e rendit kanë zbuluar dhe sekuestruar 9 fishekë të kalibrit 7.62×39 mm, për të cilët ekziston dyshimi se mbaheshin pa leje valide nga institucionet kompetente. Për këtë shkelje, S.S. ngarkohet edhe me veprën penale “Mbajtja në pronësi, kontroll ose posedim të paautorizuar të armëve”, nga neni 366, paragrafi 1 i KPRK-së. Të dyshuarit ndodhen nën masën e ndalimit prej 48 orësh që nga data 24 shtator 2026, me vendim të Prokurorit të Shtetit, për shkak të dyshimeve mbi veprat penale të lartcekura.