Bllokada në Kuvend rrezikon miliona euro, Kurti: Po humbasim fondet e Planit të Rritjes së BE-së

Kryeministri i Republikës së Kosovës, Albin Kurti, ka ngritur alarmin se ngërçi politik dhe bllokada në Kuvend kanë lënë vendin pa mundur të miratojë legjislacionin e domosdoshëm për jetësimin e reformave të përcaktuara në kuadër të Planit të Rritjes të Bashkimit Evropian. Këto deklarata kryeqeveritari i bëri gjatë punimeve të mbledhjes së dytë të Këshillit Ministror për Integrim Evropian, në cilësinë e Komitetit Drejtues për Planin e Rritjes, ku nën lupë u vunë ecuria e reformave, nismat ekzistuese dhe programet IPA. Duke folur për hapat e deritanishëm, Kurti bëri të ditur se deri më 30 qershor janë përmbushur dhe i janë përcjellë Komisionit Evropian 20 hapa reformues, vlera e të cilëve kap shifrën e 153.3 milionë eurove. “Kështu që po e hap mbledhjen e dytë të Këshillit Ministror për Integrim Evropian në funksionin e tij si Komiteti Drejtues për Planin e Rritjes, e në të cilin do të diskutojmë për ecurinë e zbatimit të reformave, për gjendjen e projekteve ekzistuese, si dhe të programeve IPA. Më 15 korrik i kemi dorëzuar Komisionit Evropian raportin e parë zyrtar për zbatimin e agjendës të reformave dhe kërkesën e parë për lirimin e fondeve nga Plani i Rritjes. Deri më 30 qershor kemi zbatuar dhe raportuar te Komisioni Evropian 20 hapa të reformave, në vlerë prej gjithsej 153.3 milionë euro në fonde të Bashkimit Evropian. Aktualisht Komisioni Evropian është duke kryer vlerësimin, e pas vlerësimit Komisioni do ta miratojë vendimin për lirimin e fondeve dhe pastaj Kosova do të përfitojë fondet përkatëse sipas këtij vendimi”, theksoi ai. Në vijim të fjalës së tij, kreu i ekzekutivit paralajmëroi se në fillim të javës që vjen, legjislativit do t'i dërgohen për miratim tri marrëveshje ndërkombëtare për programet IPA, përmes të cilave synohet thithja e 258 milionë eurove për vendin. “Ndërkohë, në fillim të javës që vjen, Kuvendit do t’i përcillen tri marrëveshje ndërkombëtare për programet IPA, e ku përfshihen dy amendamente për projektet nga IPA 2021 dhe IPA 2022, si dhe marrëveshja financiare IPA 2026-2027, nga të cilat Kosova pritet të përfitojë 258 milionë euro. Presim nga Zyra Ligjore dhe Ministria e Financave të përfundojnë pa vonesa opinionet që u kërkohen. Marrë së bashku, nga Plani i Rritjes dhe IPA janë mbi 400 milionë euro që Kosova do të përfitojë për qeverisje të mirë e zbatim të reformave drejt anëtarësimit në Bashkimin Evropian”, u exprish Kurti. Megjithatë, kreu i Qeverisë vuri anën tjetër të medaljes, duke bërë të ditur se nga 13 reformat e planifikuara për afatin e 30 qershorit, plot gjashtë prej tyre nuk u finalizuan në kohë, çka rezultoi me humbjen e mbi 40 milionë eurove për Kosovën. “Në anën tjetër, siç jeni njoftuar edhe nga koordinatori kombëtar, nga 13 reformat e parapara për afatin e 30 qershorit, 6 nuk kanë arritur që të zbatohen në kohë. Për rrjedhojë, nga vlera prej 90.7 milionë euro e paraparë për afatin e qershorit, nuk u përfituan mbi 40 milionë euro”, tha ai. Si fajtore kryesore për këtë dështim financiar, Kurti rreshtoi bllokadën parlamentare që ka penguar kalimin e ligjeve, ndërsa shtoi se këto projekte do të riprocedohen në seancën e ardhshme plenare. “Arsyeja e mospërfitimit të këtyre mjeteve është bllokada në Kuvend, e cila pamundësoi miratimin e ligjeve. Megjithatë, të gjitha projektet e parapara për afatin e 30 qershorit do të procedohen në seancën e rradhës të Kuvendit. Pra, nga bllokada në Kuvend nuk dështon arritja për realizimin e reformave të parapara në Planin e Rritjes dhe puna e mirë e qeverisë, por do të humbin mjetet e dedikuara për to”, përfundoi Kurti. Në fund, ai bëri thirrje që vëmendja dhe energjitë të kanalizohen te 22 reformat e ardhshme që kanë afat realizimi deri në fund të muajit dhjetor, vlera e të cilave kap shifrën e 131.4 milionë eurove nga fondet evropiane.