Procesi i anëtarësimit, Rama cakton afatin: Brenda këtij viti nis mbyllja e kapitujve me BE-në

Kryeministri Edi Rama ka bërë të ditur se vendi ynë po hyn në një stad tjetër të rrugëtimit drejt Bashkimit Europian, ku synohet që faza e mbylljes së kapitujve negociues të startojë para mbylljes së këtij viti dhe të marrë hov gjatë vitit që vjen. Gjatë daljes për mediat në krah të presidentes së Komisionit Europian, Ursula von der Leyen, kreu i ekzekutivit vuri në dukje përkushtimin maksimal të kabinetit qeveritar për të avancuar me këtë axhendë, duke bërë me dije se një numër i madh kapitujsh pritet të mbyllen përfundimisht gjatë vitit 2025. “Unë dua të konfirmoj edhe një herë, edhe publikisht, vullnetin tonë të hekurt për të çuar përpara të gjitha punët e një procesi që tanimë ka hyrë në fazën e mbylljes së kapitujve. Përgatitemi për të nisur me mbylljen e kapitujve para fundit të vitit dhe pastaj për të vijuar vitin e ardhshëm me një pjesë të konsiderueshme të kapitujve”, u shpreh ai. Në fjalën e tij, kreu i qeverisë shqiptare shprehu mirënjohjen për ndihmën e deritanishme të bllokut europerëndimor dhe mekanizmat financiarë e ekonomikë të ofruar nëpërmjet Planit të Rritjes, duke rikonfirmuar njëkohësisht vendosmërinë për të çuar deri në fund reformat kyçe që kërkon procesi i integrimit.