Mashtrim në tenderin për ngrohjen e sallës së baletit në Prizren: Aktakuzë ndaj biznesmenit që zëvendësoi bakrin me ‘inox’

Prokuroria Themelore në Prizren ka zyrtarizuar aktakuzën ndaj të pandehurit Xhelal Kukaj, në cilësinë e pronarit dhe personit përgjegjës të kompanisë “EKO ING” SH.P.K. (e regjistruar si “E.I.” SH.P.K.), si dhe ndaj vetë subjektit juridik, nën dyshimin e bazuar për veprën penale të keqpërdorimit dhe mashtrimit në prokurimin publik. Sipas dokumentit të akuzës, veprimet e të pandehurve përbëjnë shkelje të dispozitave të përcaktuara në nenin 415 të Kodit Penal të Republikës së Kosovës. Ngjarja daton më 10 dhjetor 2022 në Prizren, ku sipas Prokurorisë, Xhelal Kukaj me dashje ka shkelur rregullat e tenderit dhe nuk ka përmbushur zotimet e marra përsipër me kontratën e titulluar “Rregullimin e nxemjes qendrore në sallën e baletit në SHM ‘Lorenc Antoni’”. Në aktakuzë theksohet se i pandehuri ka instaluar materiale në kundërshtim të plotë me kushtet kontraktuale. Konkretisht, ai ka vendosur gypa të galvanizuar dhe të çelikut të zi e të materialit ‘inox’, ndërkohë që në projekt ishte parashikuar vendosja e gypave të bakrit. Këto ndryshime nuk përputhen me paramasat, parallogaritë dhe specifikimet teknike për montimin e pajisjeve, veprime këto të ndërmarra me qëllim të përfitimit të kundërligjshëm financiar, duke i shkaktuar dëm të ndjeshëm buxhetit të Komunës së Prizrenit. Njëkohësisht, organet e ndjekjes penale bëjnë me dije se edhe personi juridik “E.I.” SH.P.K. akuzohet për shkelje të rregullave të prokurimit dhe moszbatim të kontratës me synim përfitimin e dobisë pasurore. Gjatë dorëzimit të aktakuzës, prokurori i çështjes i ka kërkuar gjykatës kompetente që, pas përfundimit të shqyrtimit gjyqësor, shqyrtimit dhe vlerësimit të provave materiale, të pandehurit të shpallen fajtorë dhe të marrin dënimet e parashikuara me ligj.