Mashtrim në tender: Aktakuzë ndaj pronarit të biznesit dhe kompanisë në Prizren

Prokuroria Themelore në Prizren, konkretisht Departamenti i Krimeve të Rënda, ka zyrtarizuar aktakuzën ndaj të pandehurit Xh.K., në cilësinë e drejtuesit të subjektit afarist “E.I.” SH.P.K., si dhe ndaj vetë personit juridik “E.I.” SH.P.K., nën dyshimet e bazuara për veprën penale të mashtrimit dhe keqpërdorimit në prokurimin publik. Të dy të pandehurit ngarkohen nga organet e ndjekjes për shkelje ligjore të sanksionuara sipas nenit 415 të Kodit Penal të Republikës së Kosovës. Sipas dokumentit të prokurorisë, ngjarja daton më 10 dhjetor 2022 në Prizren, ku Xh.K., në cilësinë e pronarit dhe personit përgjegjës të kompanisë “E.I.” SH.P.K., me dashje ka shkelur rregullat dhe procedurat e prokurimit publik, duke dështuar të përmbushë detyrimet kontraktuale lidhur me projektin e titulluar “Rregullimin e nxemjes qendrore në sallën e baletit në SHM ‘Lorenc Antoni’”. Në aktakuzë theksohet se i pandehuri ka përdorur materiale për ngrohjen qendrore që binin ndesh me kushtet e kontratës. Konkretisht, ai ka instaluar gypa të galvanizuar dhe të çelikut të zi, si dhe të materialit ‘inox’, në vend të gypave të bakrit të paraparë në marrëveshje, duke shkelur paramasat, parallogaritë dhe specifikimet teknike për furnizim dhe montim, me qëllim përfitimi të kundërligjshëm dhe duke i shkaktuar dëm financiar buxhetit të Komunës së Prizrenit. Po ashtu, hetimet e prokurorisë ngarkojnë edhe vetë personin juridik “E.I.” SH.P.K. si përgjegjës për shkeljen e rregullave të prokurimit publik dhe mospërfillje të kontratës me synim përfitimin e dobisë pasurore. Me rastin e dorëzimit të kësaj aktakuze, prokurori i çështjes i ka kërkuar gjykatës kompetente që, pas përfundimit të shqyrtimit gjyqësor, shqyrtimit dhe vlerësimit të provave materiale, të pandehurit të shpallen fajtorë dhe të marrin dënimet e merituara konform dispozitave ligjore në fuqi.