Trepça dikton lojën në finalen e Superkupës, shkon në pushim me epërsi ndaj Bashkimit

KB Trepça ka mbyllur pjesën e parë të finales së ProCredit Superkupës së Kosovës me një avantazh prej nëntë pikësh, 44-35, përballë KB Bashkimit. Ndeshja e rëndësishme po zhvillohet në palestrën sportive “Mizahir Isma” në Rahovec, ku mitrovicasit kanë shfaqur një performancë më të qëndrueshme deri në këtë fazë të takimit. Skuadra nga Mitrovica e nisi takimin me ritëm të lartë, duke e mbyllur dhjetëminutëshin e parë me rezultat 24-22. Në çerekun e dytë, “xehetarët” arritën të thellojnë epërsinë, duke krijuar një distancë më të sigurt rezultative ndaj prizrenasve përpara se ekipet të shkonin në dhomat e zhveshjes. Lojtari më i dalluar për Trepçën deri më tani është Shannon Shorter, i cili ka kontribuar me 13 pikë, 3 kërcime dhe 1 asistim, i ndjekur nga Jacori Payne me 11 pikë, duke ruajtur saktësi perfekte prej 5/5 nga loja. Në anën tjetër, te Bashkimi, Adrio Bailey po udhëheq ekipin me 10 pikë e 6 kërcime, ndërsa Drilon Hajrizi ka kontribuar me 7 pikë. Dardan Kapiti gjithashtu ka shtuar 6 pikë, të gjitha të realizuara nga vija e gjuajtjeve të lira. Teksa Trepça është në kërkim të trofeut të parë për këtë edicion, ekipi i Bashkimit pritet të angazhohet maksimalisht në pjesën e dytë për të tentuar përmbysjen e rezultatit dhe për të ndryshuar rrjedhën e kësaj finaleje dramatike.