Vala e pakënaqësisë vazhdon: Vijojnë protestat në Prishtinë në mbrojtje të ish-krerëve të UÇK-së

Për të katërmbëdhjetën ditë me radhë, qytetarët janë tubuar sërish në sheshin “Skënderbeu” në kryeqytet, për të shprehur mbështetjen e tyre ndaj ish-krerëve të Ushtrisë Çlirimtare të Kosovës, nën thirrjen e përbashkët “Jo në emrin tim”. Këto tubime paqësore janë shtrirë përgjatë ditëve të fundit si në Prishtinë, ashtu edhe në qytete të tjera të vendit, ku pjesëmarrësit kanë shprehur hapur kundërshtimin e tyre ndaj vendimit gjyqësor, duke kërkuar drejtësi për ish-udhëheqësit e UÇK-së. Ndërkohë, Kuvendi i Kosovës ka ndërmarrë një hap zyrtar duke miratuar njëzëri – me 99 vota pro, pa asnjë votë kundër dhe asnjë abstenim – një deklaratë të posaçme lidhur me vendimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit. Në tekstin e kësaj deklarate, institucioni më i lartë legjislativ i vendit ka shprehur shqetësimin e thellë si për aktgjykimin e shkallës së parë, ashtu edhe për mungesën e transparencës dhe cenimin e standardeve për një proces të drejtë gjyqësor. Parlamenti e ka cilësuar si plotësisht të papranueshëm konstatimin mbi ekzistencën e një ndërmarrjeje të përbashkët kriminale, si dhe përgjegjësinë penale që, mbi këtë bazë, u është ngarkuar secilit prej figurave kryesore të UÇK-së. Nëpërmjet këtij dokumenti zyrtar, Kuvendi u ka bërë thirrje institucioneve shtetërore që të angazhohen në ndërmarrjen e hapave të domosdoshëm për mbrojtjen e së vërtetës historike dhe pastërtisë së luftës çlirimtare, duke kërkuar gjithashtu hartimin e një strategjie unike shtetërore që përfshin veprime juridike, institucionale dhe diplomatike.