Incident me armë zjarri në Fushë Kosovë: Plagoset një qytetar, policia në ndjekje të autorit

Një incident i rëndë ka ndodhur në fshatin Miradi të Fushë Kosovës, ku një person ka pësuar plagë nga armët e zjarrit dhe ka kërkuar ndihmë mjekësore. Rasti është konfirmuar për portalin tonë nga zëdhënësja e Policisë rajonale të Prishtinës, Flora Ahmeti, e cila bëri me dije se sinjalizimi nga Qendra Klinike Universitare e Kosovës (QKUK) ka mbërritur rreth orës 15:30. Pas marrjes së këtij njoftimi, strukturat kompetente policore janë vënë menjëherë në lëvizje, duke ndërmarrë veprimet e para hetimore me qëllim zbardhjen e plotë të dinamikës dhe rrethanave në të cilat ka ndodhur ngjarja. Sipas zyrtares policore, autoritetet kanë arritur që të identifikojnë personin e dyshuar si autor të plagosjes, i cili ndodhet ende në arrati, ndërkohë që puna operativo-hetimore vijon intensivisht nën drejtimin dhe koordinimin e Prokurorit të Shtetit.