Nis në kryeqytet edicioni i 6-të i Festivalit të Filmit Sportiv, Krasniqi: Traditë që po lartëson sportin kosovar

Komiteti Olimpik i Kosovës ka inauguruar këtë të martë edicionin e gjashtë të Festivalit të Filmit Sportiv “Prishtina 2026”, ngjarje kjo që po zhvillohet në hapësirat e kinemasë ABC në Prishtinë. Në fjalën e tij gjatë ceremonisë hapëse, kreu i Komitetit Olimpik të Kosovës, Ismet Krasniqi, vuri theksin te rëndësimi i këtij manifestimi kulturor e sportiv, i cili tashmë është shndërruar në një ngjarje tradicionale për vendin. “Është edicioni i gjashtë që po mbahet Festivali i Filmit Dokumentar. Kosova tashmë e ka bërë traditë dhe kjo traditë po vazhdon. Ka filluar nga presidenti i nderit, Besim Hasani, e ne po e vazhdojmë traditën e tij. Duhet ta ngremë edhe më lart dhe shpresoj që edhe pas meje do të vijë dikush që do ta ngrejë edhe më lart, sepse ky është qëllimi ynë, që të punojmë bashkë dhe ta çojmë Kosovën në vendin që e meriton”, u shpreh Krasniqi. Më tej, ai ndau edhe detaje rreth paraqitjeve të suksesshme të kinematografisë kosovare në Festivalin Botëror të Filmit Sportiv në Milano, duke bërë të diture se vendi ynë është shpërblyer vazhdimisht me mirënjohje dhe pozita të larta. “Kosova u paraqit me shumë filma në Festivalin Botëror në Milano dhe deri tash kemi pasur gjithmonë suksese, kemi marrë mirënjohje dhe kemi zënë vende shumë të mira me filmat tanë që i kemi prezantuar atje. Dua t’i falënderoj autorët e hershëm që kanë marrë pjesë atje, po ashtu edhe në këtë rast autorët e këtij filmi, ‘Karate e Yjeve’. Është një film i cili për mua është i veçantë, sepse edhe unë vij nga sporti i karatesë dhe normalisht që sot kam ndjenja të veçanta, sidomos kur e shohim edhe filmin dokumentar. Karateja dihet që është një prej sporteve më të vjetra dhe më masovike në Kosovë. Karateja ka dhënë shumë kontribut në sportin tonë me vite të tëra dhe unë e kam fatin që jam një prej gjeneratave të treta të karatesë në Kosovë”, shtoi ai. Në përmbyllje të fjalës së tij, presidenti i KOK-ut drejtoi një thirrje të hapur për prindërit, duke i këshilluar që t'i orientojnë fëmijët e tyre drejt kësaj disipline. “Ky është një mesazh shumë i mirë, ndoshta edhe për ata të cilët kanë fëmijë, që t’i çojnë në karate dhe të merren me karate, sepse është një sport fisnik, një sport që fëmijët tanë i mëson me disiplinë, kulturë, edukatë dhe të gjitha të mirat”, tha Krasniqi. Pas përfundimit të pjesës zyrtare, të pranishmit patën rastin të ndjekin premierën e dokumentarit “Karate e Yjeve”, prodhim i “Mitrosport & Promax Studio”, i cili sjell në vëmendje rrugëtimin e karatesë në Kosovë përmes rrëfimeve të tri gjeneratave të ndryshme sportistësh. Manifestimi do të vijojë edhe gjatë ditës së mërkurë me shfaqjen e dy dokumentarëve vendorë. Fillimisht, në orën 18:00, do të jepet filmi “Sara”, nga produksioni “Art without limit”, që sjell jetën e një 16-vjeçareje e cila, pavarësisht sfidës së mungesës së dorës së djathtë, shkëlqen si sportiste. Ndërkaq, në orën 18:30 do të shfaqet dokumentari “Brezi i parë”, punim i Valdete Osmanit dhe Enis Imerit, i cili evokon historitë e guximshme të grave dhe vajzave kosovare nga vitet ’70 të cilat sfiduan paragjykimet, diskriminimin dhe represionin e kohës nën ish-Jugosllavi për t'iu bashkuar sportit të basketbollit dhe hendbollit. Krahas prodhimeve vendase, në festival janë përfshirë edhe filma dokumentarë me fokus sportin ndërkombëtar, me synimin e qartë të organizatorëve për ta shndërruar këtë ngjarje në një platformë të përhershme për promovimin e vlerave dhe historive sportive përmes artit të shtatë.