Kryeqyteti zyrtarizon vendimin: Hashim Thaçi, Kadri Veseli, Jakup Krasniqi dhe Rexhep Selimi bëhen 'Qytetarë Nderi' të Tiranës

Bashkia e Tiranës ka zyrtarizuar vendimin e saj, vetëm pak ditë pas vendimit të marrë nga Dhomat e Specializuara në Hagë ndaj katër ish-liderëve të Ushtrisë Çlirimtare të Kosovës (UÇK). Përmes një njoftimi zyrtar në rrjetet sociale, kryetari i bashkisë, Erion Veliaj, kishte paralajmëruar më parë se do t'i paraqiste Këshillit Bashkiak propozimin që Hashim Thaçi, Kadri Veseli, Jakup Krasniqi dhe Rexhep Selimi të nderohen me këtë titull të lartë. Krahas kësaj nisme, kreu i Bashkisë së Tiranës u kishte bërë thirrje edhe komunave dhe bashkive të tjera anembanë trojeve shqiptare që të ndërmarrin hapa të ngjashëm për nderimin e figurave kombëtare. Propozimi i zyrtarizuar tashmë është hedhur në votim, duke u miratuar zyrtarisht si vendim i institucionit vendor të kryeqytetit shqiptar. “Nga sot, me propozim të Kryebashkiakut Erion Veliaj, Hashim Thaçi, Kadri Veseli, Jakup Krasniqi dhe Rexhep Selimi shpallen ‘Qytetarë Nderi’ të Tiranës. Një vendim i miratuar unanimisht nga Këshilli Bashkiak i Tiranës, në nderim të kontributit dhe rolit të tyre në historinë e Kosovës dhe në luftën e UÇK-së”, theksohet në komunikatën zyrtare të Bashkisë së Tiranës. Ky titull për ish-krerët e UÇK-së vjen si një shenjë mirënjohjeje dhe falënderimi e ndërmarrë nga Tirana zyrtare, në shenjë vlerësimi për angazhimin dhe sakrificën e tyre historike përgjatë gjithë rrugëtimit të Kosovës drejt lirisë, pavarësisë dhe shtetndërtimit.