Gabimet që ngushtojnë shtëpinë tuaj: 6 sende që duhet t’i largoni menjëherë nga korridori

Për shumë prej nesh, korridori shërben si pika e parë dhe e fundit e kontaktit në përditshmëri, aty ku lëmë çelësat, heqim palltot dhe ndërrojmë këpucët. Megjithatë, ekspertët e interierit paralajmërojnë se kjo hapësirë nuk duhet të shndërrohet kurrë në një depo, pasi grumbullimi i panevojshëm e kthen rutinën në rrëmujë vizuale dhe e bën shtëpinë të duket shumë më e vogël. Dizajnerja e interierit Margo Cim vë në dukje se një ndër gabimet më të shpeshta janë varëset dhe raftet e hapura të ngarkuara tej mase. Sipas saj, edhe mjetet më funksionale e humbin kuptimin kur mbingarkohen, ndërsa përdorimi i dollapëve të mbyllur ndihmon dukshëm në mbajtjen nën kontroll të rrëmujës së përditshme. Ekspertët sugjerojnë se ekzistojnë gjashtë kategori sendesh që nuk duhet të mbahen kurrë në hyrje të shtëpisë. E para në listë janë varëset e stërmbushura me pallto e xhaketa, ku pranë derës duhet të qëndrojë vetëm nga një ose dy veshje për secilin anëtar të familjes, ndërsa pjesa tjetër duhet sistemuar në dollap. Së dyti, këpucët e shumta si atletet, çizmet apo këpucët e punës e bëjnë hyrjen të papastër brenda pak sekondash. Praktike është të mbahen vetëm ato që vishen rregullisht, ndërsa përkohësisht këpucët e lagura mund të lihen vetëm mbi një shtrojë derisa të thahen. E treta, çadrat e lagura dhe veshjet e futur menjëherë në dollap pa u tharë, rrezikojnë të krijojnë erëra të rënda dhe lagështi në ambient. Për këtë arsye, ato duhet të thahen paraprakisht në një hapësirë tjetër. Së katërti, çantat e shpinës dhe qeset e blerjeve shpesh shndërrojnë tavolinën e hyrjes në pikë grumbullimi. Aty duhet të mbahen vetëm çantat që do të përdoren së shpejti, kurse qeset e ripërdorshme mund të bashkohen në një vend të vetëm. Së pesti, pakot e pahapura, librat apo sendet që na duhen për nesër në mëngjes shpesh harrohen me ditë të tëra në korridor. Pakot është mirë të hapen menjëherë, ndërsa sendet e domosdoshme mund të vendosen pranë çelësave në një raft të dedikuar. Së gjashti, letrat, faturat dhe monedhat e vogla pushtojnë shpejt çdo sipërfaqe të lirë, ndaj një enë e vetme për çelësat dhe një ndarje për dokumentet mjaftojnë për të vendosur rregull. Në një mjedis të vogël, çelësi nuk është vetëm sasia e sendeve, por edhe ekspozimi i tyre. Xhaketat, çantat dhe këpucët me ngjyra të ndryshme prodhojnë një zhurmë vizuale që e zvogëlon optikisht hapësirën. Zgjidhja nuk kërkon domosdoshmërisht blerjen e mobilieve të reja, por një filtër të rreptë të gjërave që përdorim rrallë. Rregulli i artë mbetet i qartë: gjërat e përditshme duhet të jenë gjithmonë të arritshme, kurse sendet sezonale dhe ato të panevojshme nuk duhet të zënë kurrë vendin më strategjik pranë derës së shtëpisë.