Kryeqyteti nderohet me histori: Thaçi, Veseli, Krasniqi dhe Selimi shpallen “Qytetarë Nderi” të Tiranës

Këshilli Bashkiak i Tiranës ka zyrtarizuar vendimin për t'i dhënë titullin e lartë “Qytetar Nderi” katër ish-drejtuesve kryesorë të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimit. Ky vendim vjen si një nismë e ndërmarrë nga kryetari i Bashkisë së Tiranës, Erion Veliaj, me qëllim që të vlerësohet lart angazhimi dhe sakrifica e tyre gjatë epopesë së luftës së UÇK-së, si dhe kontributi i çmuar në shtetformimin dhe skenën politike të Kosovës. Propozimi i kreut të bashkisë u hodh për votim pas një mbështetjeje unanime në fazat paraprake të shqyrtimit dhe u miratua zyrtarisht nga anëtarët e Këshillit Bashkiak të kryeqytetit. Ky hap simbolik i Tiranës vjen në një kohë mjaft të ndjeshme, ndërkohë që katër personalitetet historike të Kosovës ndodhen në paraburgim në Hagë, duke u ballafaquar me procesin gjyqësor pranë Dhomave të Specializuara.