Nga takimet diplomatike në Paris e Dublin te punimet e PS-së: Rama përmbledh javën përmes imazheve

Kryeministri Edi Rama ka publikuar në rrjetet e tij sociale një përmbledhje me foto nga veprimtaritë më kryesore të javës që lamë pas, ku veçohen diplomacia ndërkombëtare në Francë e Irlandë dhe punët politike në vend. Së pari, me ftesë të presidentit francez Emmanuel Macron, kreu i qeverisë zhvilloi një vizitë në Paris për të marrë pjesë në Forumin e Paqes. Diskutimet në këtë ngjarje u fokusuan te qeverisja e mirë si element kyç për ruajtjen e paqes së qëndrueshme, stabilitetit dhe zhvillimit, përballë sfidave bashkëkohore gjeopolitike, teknologjike e klimatike. Gjatë kësaj vizite në kryeqytetin francez, kryeministri Rama, i shoqëruar nga bashkëshortja e tij Linda Rama, mori pjesë në pritjen zyrtare të organizuar nga presidenti Macron dhe bashkëshortja e tij, Brigitte Macron, në Pallatin Élysée. Po ashtu, Rama ndau sekuenca nga paneli i posaçëm “Spotlight”, ku u ndal te perspektiva europiane e vendit dhe domosdoshmëria e integrimit në Bashkimin Europian për të ardhmen e rinisë shqiptare. Një tjetër ndalesë e rëndësishme e agjendës javore ishte pjesëmarrja në Samitin e nëntë të Komunitetit Politik Europian (EPC) në Dublin, ku kryeministri realizoi takime me drejtues të lartë dhe liderë të ndryshëm evropianë. Po në kryeqytetin irlandez, Rama ishte pjesëmarrës në aktivitetin e organizuar nga Instituti i Çështjeve Ndërkombëtare dhe Europiane (IIEA), nën temën “Udhëtimi Europian i Shqipërisë: Nga aspirata te integrimi”. Në fjalën e tij, ai nënvizoi rëndësinë e një integrimi të shkallëzuar në BE, si një mjet për uljen e hendekut ekonomik dhe financiar ndërmjet shteteve kandidate dhe atyre anëtare. Agjenda javore e kryeministrit u përmbyll me punimet e mbledhjes së Asamblesë Kombëtare të Partisë Socialiste, ku vëmendja u përqendrua te zhvillimet aktuale dhe çështjet organike që lidhen me veprimtarinë e kësaj force politike.