Kosova drejt anëtarësimit të plotë në Frankofoni, Konjufca: Jemi gati për përgjegjësitë e reja

Kryediplomati i Kosovës, Glauk Konjufca, ka rikonfirmuar ambicien e shtetit tonë për t'u bërë pjesë e plotë e Organizatës Ndërkombëtare të Frankofonisë (OIF). Ky angazhim është bërë i ditur gjatë zhvillimit të punimeve të Konferencës së 48-të Ministrore të kësaj organizate, e cila po mbahet në Phnom Penh të Kamboxhias. Nëpërmjet një komunikimi në rrjetet sociale, Konjufca ka nënvizuar se Kosova posedon kapacitetet dhe gatishmërinë e plotë për të përmbushur detyrimet që dalin nga ky status i anëtarësimit. Ai shfrytëzoi rastin për t'i shprehur mirënjohje zëvendëskryeministrit të Kamboxhias, Prak Sokhonn, për mikpritjen dhe drejtimin e këtij samiti të rëndësishëm ndërkombëtar. Duke iu referuar tematikës së Samitit të 20-të të Frankofonisë, ministri Konjufca vlerësoi se thirrja për riinvestim në paqe është tejet domethënëse për Kosovën. Sipas tij, përvoja e shtetit tonë në ndërtimin e vlerave demokratike pas periudhës së luftës, e bën Kosovën një zë kredibil në promovimin e dialogut. Në fjalën e tij, ai shtoi se pajtimi i vërtetë mund të arrihet vetëm përmes së vërtetës dhe llogaridhënies. Po ashtu, Konjufca potencoi se ndërtimi i një paqeje afatgjatë është i pandashëm nga nevoja për t’iu ofruar të rinjve një perspektivë të qartë dhe të sigurt për të ardhmen.