Diplomacia në Nju Jork: Kush nga liderët e Ballkanit shkëlqeu dhe kush mbeti në hije gjatë punimeve të OKB-së?

Në kuadër të Asamblesë së 81-të të Përgjithshme të Kombeve të Bashkuara, e cila mblodhi në Nju Jork krerët e 193 shteteve të botës, dinamika e takimeve dypalëshe ka nxjerrë në pah dallime të ndjeshme mes liderëve të Ballkanit Perëndimor. Tradicionalisht, Pallati i Qelqtë dhe zonat përreth u shndërruan në një arenë intensive diplomacie përfaqësuesish nga Serbia, Mali i Zi, Maqedonia e Veriut, Shqipëria, Kroacia dhe Kosova. Sipas të dhënave mbi aktivitetin diplomatik të pasqyruara në median online amerikane, agjendat e liderëve rajonalë kanë shfaqur qasje dhe rezultate mjaft të ndryshme gjatë kësaj jave të ngjeshur takimesh. Presidenti i Serbisë, Aleksandar Vuçiç, ka regjistruar axhendën më të gjerë të kontakteve. Lista e tij përfshin takime me Sekretarin e Përgjithshëm të OKB-së, Antonio Guterres, Ursula von der Leyen, Kaja Kallas, si dhe zyrtarë të lartë nga Shtetet e Bashkuara, Gjermania dhe Britania e Madhe, krahas atyre me rusin Sergey Lavrov dhe kinezin Han Zheng. Ky spektër i gjerë gjeografik e ka bërë aktivitetin e tij ndër më të larmishmit. Nga ana e tij, presidenti i Malit i Zi, Jakov Milatoviç, ka zhvilluar një kalendar mjaft të dendur takimesh, të përqendruara kryesisht në hapësirën evropiane. Përveç bisedimeve me Guterres dhe krerë të shteteve të ndryshme evropiane, ai u dallua edhe si i vetmi lider rajonal deri më tani që mori pjesë në pritjen e organizuar nga Donald Trump. Pavarësisht statusit të Kosovës si vend joanëtar, kryeministri Albin Kurti ka arritur të realizojë një seri takimesh të rëndësishme jashtë dyerve zyrtare të OKB-së. Ai ka zhvilluar bisedime me presidentin turk Recep Tayyip Erdogan, kryeministrin kroat Andrej Plenkoviç, presidentin e Bankës Botërore Ajay Banga, drejtoreshën e FMN-së Kristalina Georgieva, ambasadoren britanike Karen Pierce, kongresmenë amerikanë dhe emirin e Kuvajtit, si dhe ka marrë pjesë në takimin e Ballkanit Perëndimor me Kaja Kallas. Ky profil i fokusuar te institucionet financiare globale dhe aleatët perëndimorë e pozicionon atë si liderin më të suksesshëm të një shteti joanëtar në këtë ngjarje. Kryeministri i Maqedonisë së Veriut, Hristijan Mickoski, e ka orientuar fokusin e tij kryesisht drejt bashkëpunimit rajonal, duke zhvilluar takime me homologët Kurti, Vuçiç e Plenkoviç, krahas kontakteve me Guterres, përfaqësues amerikanë dhe pjesëmarrjes në tryezën e Ballkanit Perëndimor. Në këtë krahasim, kryeministri i Shqipërisë, Edi Rama, shfaqet me aktivitetin më të kufizuar për sa i përket dokumentimit zyrtar. Edhe pse ekzekutivi shqiptar ka deklaruar se janë mbajtur një sërë takimesh, në mungesë të një liste të detajuar me emra liderësh ndërkombëtarë dhe mungesës së pasqyrimit në shtypin amerikan, prania e tij është fokusuar kryesisht në forume si European Corporate Council dhe gala e Albanian-American Relations Council, si dhe në takime me figura shqiptare të rajonit. Në vlerësimin përfundimtar bazuar te numri, niveli dhe diversiteti i kontakteve, Aleksandar Vuçiç kryeson listën për mbulimin e gjerë gjeopolitik, i ndjekur ngushtë nga Jakov Milatoviç për densitetin e takimeve evropiane. Albin Kurti vlerësohet me të drejtë si më i suksesshmi “jashtë dyerve të OKB-së” falë arritjeve diplomatike me institucionet e fuqishme financiare dhe aleatët perëndimorë. Ndërkohë, Hristijan Mickoski ruan një mesatare rajonale, ndërsa Edi Rama mbetet më i pasuksesshmi në këtë përballje për shkak të mungesës së të dhënave publike për takime dypalëshe të nivelit të lartë.