Vuçiq ankohet për ndalesën e hyrjes në Kosovë: Familja ime nuk lejohet nga Kurti

Presidenti i Serbisë, Aleksandar Vuçiq, ka ngritur pretendime se atij dhe anëtarëve të familjes së tij u është pamundësuar hyrja në territorin e Kosovës për një kohë të gjatë. Sipas tij, institucionet e Kosovës, nën udhëheqjen e kryeministrit Albin Kurti, refuzojnë t'u japin leje për vizita, qoftë edhe për motive private. Këto komente Vuçiq i bëri gjatë një paraqitjeje në emisionin serb “Nacionalni Magazin”, ndërsa po analizonte vizitën e përfaqësuesve të Listës Studentore në Graçanicë dhe takimin e tyre me peshkopin Teodosije. Ai vlerësoi se trajtimi që iu bë këtij grupi dëshmon për një qasje selektive nga ana e autoriteteve të Prishtinës. “Unë nuk kam mundësi të hyj në Kosovë prej vitesh, as në cilësinë e qytetarit. Asnjë anëtar i familjes sime nuk mund të realizojë vizita private, sepse Albin Kurti nuk e lejon një gjë të tillë. Ndërkohë, për të tjerët ky rregull nuk vlen”, deklaroi kreu i shtetit serb. Vuçiq shprehu gjithashtu dyshime rreth mënyrës së organizimit të kësaj vizite. Ai vuri në pah kontradiktat në deklaratat e përfaqësuesve të Listës Studentore, të cilët fillimisht kishin pretenduar se vizita ishte e natyrës private, për t'u konfirmuar më pas përmes një komunikate se ata ishin pritur nga peshkopi Teodosije në cilësinë e përfaqësuesve të organizatës së tyre. Sipas tij, kjo dëshmon se ata kishin siguruar leje për hyrje duke u prezantuar në një mënyrë të caktuar, ndërsa përsëriti akuzën se ndaj tij dhe familjes së tij ekziston një bllokadë e qëllimshme nga kryeministri Kurti.