“Zemra ime ka mbetur aty ku të humba”: Tri muaj nga ndarja tragjike nga jeta e policit Altin Kryeziu

Kanë kaluar plot tre muaj nga tragjia që i mori jetën zyrtarit policor Altin Kryeziu, i cili u përplas për tokë nga një veturë teksa po shërbente në detyrë në territorin e Malishevës. Megjithatë, për më të dashurit e tij, koha duket se ka ndalur dhe pesha e mungesës mbetet e papërballueshme. Nëpërmjet një mesazhi prekës në rrjetet sociale, motra e tij, Aulonë Kryeziu, ka evokuar kujtimin e vëllit, duke shfaqur hapur dhimbjen e thellë për këtë humbje të parakohshme. “Koha ecën, por zemra ime ka mbetur aty ku të humba. Mungesa jote është një dhimbje që nuk njeh shërim, e malli për ty do të jetojë në çdo rrahje të zemrës sime”, ka shkruar ajo në dedikimin e saj. Ajo ka pranuar se realiteti pa praninë e tij është tepër i rëndë për t'u pranuar, duke e cilësuar këtë mungesë si një plagë që nuk po gjen qetësi. “Jeta është shumë e vështirë pa ty, vëllai jem”, ka përfunduar ajo shkrimin e saj emocional. Kujtojmë se Altin Kryeziu, i cili shërbente në Stacionin Policor të Malishevës, u godit nga një automjet më 16 gusht në rrugën “Ibrahim Mazreku” gjatë përmbushjes së detyrave zyrtare. Si pasojë e dëmtimeve të rënda trupore, ai ndërroi jetë pak ditë më vonë, më 23 gusht. Në anën tjetër, familja e të ndjerit ka ngritur zërin duke kërkuar drejtësi dhe paanshmëri institucionale për këtë rast. Më 13 nëntor, familjari Valon Kryeziu i drejtoi një thirrje publike Kryeprokurorit të Shtetit dhe opinionit gjerë që të monitorohet me vëmendje procesi gjyqësor dhe të zbardhen plotësisht rrethanat e ngjarjes tragjike. Ceremonia e varrimit të Altin Kryeziut u organizua më 24 gusht në fshatin Bubavec të Malishevës, ku ai u përcoll për në banesën e fundit me nderimet më të larta shtetërore.