I armatosur me pushkë dhe dhjetëra fishekë në Tiranë, bie në pranga 17-vjeçari gjatë operacionit “Guns 3”

Uniformat blu të kryeqytetit kanë vënë në pranga një të mitur, pasi është kapur duke qarkulluar i armatosur në mënyrë të paligjshme, i pajisur me një armë zjarri dhe municion luftarak. Ndërhyrja është finalizuar në rrugën e fshatit “Allgjatë” nga efektivët e Komisariatit të Policisë Nr. 6, të cilët organizuan operacionin e koduar “Guns 3”. Ky aksion u ndërmarr pasi strukturat e policisë kishin siguruar më parë të dhëna përmes rrugëve operative se në këtë zonë po lëvizte një person që mbante armë me vete. Si rezultat i ndërhyrjes, u arrestua në flagrancë adolescenti 17 vjeç, banues në zonën e Vaqarrit. Gjatë kontrollit, atij iu sekuestrua një armë zjarri e dyshuar si pushkë gjysmëautomatike, si dhe 140 copë fishekë luftarakë. Në përfundim të veprimeve të para hetimore, dosja me materialet procedurale i ka kaluar Prokurorisë për ndjekjen e mëtejshme të përgjegjësisë penale.