Magjia e vjeshtës në Lumin e Shalës, Edi Rama ndan pamjet përrallore të kësaj perle shqiptare

Gjatë stinës së vjeshtës, Lumi i Shalës shfaq një panoramë përrallore dhe relaksuese, ku ujërat e kthjellëta në nuanca blu gërshetohen në mënyrë të përsosur me tonet e arta, të kuqe dhe të verdha të pyjeve përreth, duke veçuar sidomos drurët e gështenjave dhe të blirit. Kryeministri i vendit, Edi Rama, ka ndarë me ndjekësit një video nga ky destinacion mbresëlënës, të cilin e ka vlerësuar lart si një nga thesaret më të çmuara të natyrës shqiptare. “Lumi i Shalës, një perlë e natyrës shqiptare, ku ujërat e kristalta, malet madhështore dhe bukuria e paprekur krijojnë një peizazh magjepsës”, ka shkruar kreu i qeverisë në mesazhin e tij. Ky destinacion turistik vazhdon të joshë çdo vit mijëra vizitorë, vendas e të huaj, të cilët e vizitojnë zonën përmes lundrimeve me varkë, ngjitjeve malore, notimit në ujin e ftohtë, si dhe shijimit të gatimeve tradicionale në bujtinat mikpritëse të vendosura përgjatë tij. Ky lumë ka burimin e tij rrëzë Alpeve dhe shtrihet në një gjatësi prej 37 kilometrash, duke nisur nga Radohina e deri në derdhjen në lumin Drin, ndërsa shquhet sidomos për ngjyrën e tij karakteristike blu të errët. Ecosystemi i tij strehon lloje të ndryshme peshqish, ku mbizotëron trofta e ujërave të ëmbla, ndërsa pamja e ujit të ftohtë e të kaltër, e kombinuar me shkëmbinjtë e thepisur që ngrihen lart, krijon iluzionin se ata prekin qiellin.