Operacion i Bashkimit Evropian në Mesdhe: Ndalohet cisterna e dyshuar e flotës hije të Rusisë

Forcat e Bashkimit Evropian kanë ndërmarrë një operacion kontrolli në Detin Mesdhe, duke ndalur një cisternë që dyshohet se bën pjesë në flotën e fshehtë të Rusisë. Ngjarja u bë e ditur nga shefja e diplomacisë evropiane, Kaja Kallas. Sipas deklaratave të Kallas, efektivët e misionit evropian “Operation Irini” ndërhynë të premten në bordin e anijes MV Midag, ku verifikuan se ajo po lundronte duke përdorur një flamur të rremë. “BE-ja do të vazhdojë të pengojë veprimtarinë e flotës së fshehtë ruse në det dhe përmes mjeteve diplomatike”, theksoi Kallas në një reagim të publikuar të dielën në rrjetet sociale. Ajo bëri të ditur gjithashtu se ministrat e Punëve të Jashtme të vendeve anëtare të Bashkimit Evropian pritet të miratojnë këtë të hënë një paketë të re sanksionesh kundër Moskës. Këto masa të reja do të kenë në shënjestër “bankat, blerësit dhe kompanitë që mbështesin flotën e fshehtë”. Përveç njoftimit, Kallas ndau me publikun edhe disa pamje fotografike, të cilat dokumentojnë momentin e ndërhyrjes së forcave evropiane në bordin e anijes së dyshimtë. Moska shfrytëzon flotën e saj të fshehtë për t'iu shmangur sanksioneve ndërkombëtare të vendosura nga vendet perëndimore ndaj sektorit të saj të naftës. Këto mjetet lundruese përdorin rrjete të ndërlikuara pronësie, flamuj të huaj dhe skema të ndryshme për të maskuar origjinën e karburantit që transportojnë. Ky nuk është rasti i parë i kësaj natyre; në muajin gusht, trupat e “Operation Irini” zhvilluan një inspektim të ngjashëm për verifikimin e flamurit në bordin e cisternës së naftës MV Sun, ndërsa një aksion i ngjashëm ishte ndërmarrë më herët gjatë po atij muaji edhe ndaj anijes MV Toa Payoh. “Operation Irini” u themelua në mars të vitit 2020, me objektivin kryesor të zbatimit të embargos së armëve të OKB-së ndaj Libisë, gjatë zhvillimit të Luftës së Dytë Civile në atë vend. Në fazën fillestare, kompetencat e misionit përfshinin ndalimin e trafikimit të paligjshëm të armëve, grumbullimin e të dhënave për kontrabandën e naftës, mbështetjen në luftën kundër trafikimit të migrantëve, si dhe trajnimin e autoriteteve libiane për zbatimin e ligjit dhe operacionet e kërkim-shpëtimit. Gjatë muajit tetor, mandati i “Operation Irini” u zgjat zyrtarisht deri më 31 mars 2029. Në listën e objektivave të tij tashmë figurojnë edhe ruajtja e interesave të BE-së në Mesdhe, si dhe dhënia e një kontributi aktiv për paqen dhe stabilitetin në Libi. Një nga detyrat e reja të këtij misioni është edhe angazhimi për të kufizuar veprimtarinë e flotës së fshehtë ruse, për të cilën Bashkimi Evropian vlerëson se e shfrytëzon Mesdheun si një “zonë kryesore tranziti dhe transferimi”.