Pamje të shëmtuara në New Jersey: Përleshja masive në fushë njollos sfidën mes New York Red Bulls dhe Club America

Një ballafaqim kontrollues midis New York Red Bulls dhe gjigantit meksikan Club America ka degeneruar në incidente fizike, duke lënë në hije ngjarjet sportive në fushë. Ndeshja e zhvilluar në New Jersey u mbyll me triumfin minimal 1:0 të përfaqësueses amerikane, mirëpo vëmendja e opinionit sportiv u zhvendos tërësisht te trazirat e regjistruara në minutën e 85-të të takimit. Spektakli futbollistik u shndërrua në një arenë konflikti pas një dyluftimi pranë vijës anësore. Tensioni fillimisht verbal mes protogonistëve shpërtheu shpejt në përplasje fizike dhe shkëmbim grushtesh. Në këtë situatë tensioni u përfshinë lojtarë nga të dyja kampet, ndërkohë që ndërhyrja e futbollistëve të tjerë dhe pjesëtarëve të shtabeve teknike ishte e domosdoshme për të qetësuar gjakrat. Ndër episodet më të rënda të fiksuara në kamerat e pranishme ishte goditja pas shpine që lojtari i New York Red Bulls, Andy Rojas, i dha kundërshtarit të tij nga radhët e America-s, Dagoberto Espinoza. Pasi situata u vu nën kontroll, gjyqtari kryesor ndëshkoi me karton të kuq plot pesë futbollistë të përfshirë në këtë sherr masiv. Te skuadra vendase u ndëshkuan Ronald Donkor dhe Nehuen Benedetti, kurse te mysafirët nga Meksika fushën e blertë u detyruan ta lënë parakohshëm Emilio Lara, Ramón Juarez dhe Dagoberto Espinoza. Ndërkohë, mbetet ende e paqartë nëse Rojas do të përballet me sanksione shtesë nga organet kompetente për aktin e tij gjatë përleshjes. Trazirat u amplifikuan edhe më shumë nga reagimi i tifozëve në shkallët e stadiumit, të cilët nisën të hedhin sende të ndryshme drejt fushës, ndërsa materialet filmike të incidentit bënë xhiron e rrjeteve sociale. Pas përfundimit të ndeshjes, trajneri i skuadrës së New York-ut, Michael Bradley, minimizoi disi peshën e ngjarjes, duke arsyetuar se dëshira për sukses nuk shuhet as në duelet e karakterit kontrollues. “Dëgjoni njerëzit duke thënë se nuk ka ndeshje vërtet miqësore. Lojtarët përsëri duan të garojnë dhe të fitojnë, pavarësisht se për çfarë lloj ndeshjeje bëhet fjalë. Kjo është pjesë e futbollit në disa mbrëmje”, deklaroi Bradley.