Kombëtarja e Kosovës nis seancën e fundit stërvitore para përballjes vendimtare me Irlandën

Përfaqësuesja e Kosovës ka hyrë në fazën përfundimtare të përgatitjeve për sfidën e radhës dhe të fundit në kuadër të këtij edicioni në Ligën e Kombeve, e cila do të zhvillohet kundër Irlandës. Ky duel vjen menjëherë pas barazimit pa gola, 0-0, të regjistruar një ditë më parë kundër Izraelit në stadiumin kryesor të vendit në Prishtinë. Në seancën stërvitore të zhvilluar në fushën e stadiumit “Fadil Vokrri”, trajneri Franco Foda ka mundur të llogaritë në shërbimet e 13 futbollistëve. Ndërkohë, pjesa tjetër e grupit, respektivisht lojtarët që patën minuta si titullarë në ndeshjen ndaj izraelitëve, janë fokusuar te ushtrimet rigjeneruese brenda hapësirave të palestrës së hotelit. Axhenda e “Dardanëve” parashikon udhëtimin drejt Dublinit gjatë pasdites së sotme. Atje, skuadra do të përgatitet për duelin e së martës kundër Irlandës, një përballje kjo me peshë specifike për sigurimin e vendit të dytë në grup.