Afrimi i Elia Kapriles te Shqipëria, ish-portieri i Milanit jep bekimin: Është zgjedhja e duhur

E ardhmja e portierit të Kaljarit, Elia Kaprile, vazhdon të jetë në qendër të vëmendjes në mediat sportive italiane, ku diskutimi për një përfaqësim të mundshëm të tij me ngjyrat e Kombëtares shqiptare po fiton gjithnjë e më shumë terren. Kjo temë ka nxitur reagimin e figurave të njohura të futbollit, mes të cilëve edhe ish-portieri i mirënjohur, Simone Bralja. Bralja, i cili gjatë karrierës së tij ka mbrojtur portën e klubeve prestigjioze si Milani, Xhenoa dhe Komo, ka analizuar situatën aktuale të Kapriles. Në një prononcim për mediat italiane, ai e ka vlerësuar si një hap tejet pozitiv dhe strategjik një kalim të mundshëm të gardianit të Kaljarit te Shqipëria. “E mbështes plotësisht një vendim të tillë. Shqipëria nuk është një përfaqësuese e rangut të ulët, përkundrazi, ka regjistruar rezultate mjaft mbresëlënëse. Nga ana tjetër, Italia momentalisht gëzon një organikë të kompletuar në këtë pozicion,” u shpreh Bralja. Sipas ish-portierit italian, duke parë konkurrencën e fortë dhe rrugën e bllokuar për një ftesë nga “Axurrët”, zgjedhja për t’iu bashkuar Shqipërisë është një lëvizje krejtësisht logjike dhe e pritshme për zhvillimin e mëtejshëm të karrierës së Kapriles.