Drama e prindërve të fëmijëve me fibrozë cistike: “Po detyrohemi të largohemi nga Kosova për shkak të mungesës së terapisë”

Vlora Vuqiterna, nëna e një vajze të prekur nga fibroza cistike, i është drejtuar me një letër publike ministrit të Shëndetësisë, Arben Vitia, duke kërkuar reagim urgjent për sigurimin e barit 'Trikafta' (Kaftrio). Vuqiterna, e cila është edhe bashkëpartiake e ministrit, kërkon që Ministria e Shëndetësisë t’i japë përparësi kërkesave të Shoqatës së Fibrozës Cistike, të cilat sipas saj, kanë mbetur pa përgjigje përkundër tentativave të vazhdueshme ndër vite. Në mesazhin e saj, Vuqiterna ka ngritur alarmin se mungesa e këtij trajtimi jetik po i shtyn shumë familje drejt vendimit për t’u shpërngulur nga vendi. Ajo sqaron se ky nuk është një vullnet për emigrim, por një domosdoshmëri për të shpëtuar jetën e fëmijëve të tyre. “Frymëmarrja nuk është luks, por e drejtë themelore e çdo fëmije”, ka nënvizuar ajo, duke bërë thirrje që pacientët në Kosovë të mos diskriminohen për shkak të vendbanimit dhe të kenë qasje në terapi sikurse bashkëmoshatarët e tyre në shtetet e rajonit. Edhe pse e pranon se kostoja e terapisë 'Kaftrio' është e lartë dhe paraqet një sfidë buxhetore, Vuqiterna thekson se shëndeti i fëmijëve duhet të jetë prioriteti absolut i shtetit. Aktualisht, nga rreth 170 pacientë që kanë qenë të evidentuar më parë, rreth 60 prej tyre vazhdojnë të përballen me këtë sëmundje të rëndë, duke pritur një zgjidhje që po vonon prej vitesh. “Ne nuk kërkojmë privilegje, por të drejtën për jetë dhe trajtim dinjitoz”, shkruan Vuqiterna në letrën e saj. Ajo i ka bërë thirrje ministrit Vitia që të reflektojë mbi betejën e përditshme të këtyre familjeve dhe të ndërmarrë hapa konkretë. Letra mbyllet me një thirrje emocionale për ndihmë, duke rikujtuar se pas çdo shifre dhe kërkese fshihet një jetë fëmije që ka nevojë urgjente për ndërhyrjen e institucioneve të shtetit.