Treshja e artë e Shqipërisë U19: Talentet që po shkëlqejnë në Europë dhe po ndryshojnë të ardhmen kuqezi

Kombëtarja e Shqipërisë U19 ka dhuruar spektakël në daljet e fundit, duke realizuar plot 8 gola në harkun kohor të tri ditëve. Përtej performancës së shkëlqyer të të gjithë grupit, vëmendja është përqendruar te treshja ofensive: Alen Vukaj, Gabriel Kulla dhe Armend Muslika, të cilët po konfirmohen si liderët e rinj të kësaj skuadre. Gabriel Kulla, 18-vjeçari që luan për Sassuolo U20, po kalon një formë të jashtëzakonshme. Në dy ndeshjet e fundit me fanellën kuqezi, ai ka shënuar 3 gola. Statistikat e tij me klubin italian janë mbresëlënëse, me 6 gola dhe 1 asist në 8 ndeshje, ndërsa vlen të përmendet se ka regjistruar tashmë edhe dy grumbullime me ekipin e parë të Sassuolos në Serie A. Nga ana tjetër, Alen Vukaj, sulmuesi 18-vjeçar i Inter U20, po tregon pjekuri të lartë në lojë. Me fanellën zikaltër, ai ka realizuar 4 gola dhe 1 asist në 13 takime, ndërsa në dy sfidat e fundit të Shqipërisë U19 kundër Qipros dhe Armenisë, ai ka kontribuar me 1 gol dhe 1 asist. Armend Muslika, mesfushori ofensiv që luan për Tottenham U18 në Angli, ka spikatur si një “vrastar” i vërtetë para portës. Me 4 gola në dy ndeshjet e fundit për Shqipërinë, ku përfshihet edhe një eurogol nga goditja standarde ndaj Armenisë, Muslika po tregon klasin e tij. Në Premier League U18, ai numëron 6 gola në 9 paraqitje këtë sezon. Duke parë formën e tyre të lartë dhe statistikat domethënëse, kjo gjeneratë talentesh ofron shpresë të madhe për të ardhmen. Me këtë treshe në përbërje, ambiciet e Shqipërisë për të prekur nivelet më të larta, si kualifikimi në Kampionate Botërore apo kalimi i fazave të grupeve në Europian, nuk duken më si një mision i pamundur, por si një objektiv i prekshëm.