Kuqezinjtë ringjallin interesimin për mbrojtësin e njohur, por gara bëhet e fortë

Klubi i Milanit ka kthyer sërish sytë nga Kim Min-Jae, duke e vendosur mbrojtësin e Bayern Munich dhe ish-lojtarin e Napolit në qendër të vëmendjes për repartin e prapavijës, një zonë ku kuqezinjtë kërkojnë përvojë prej disa muajsh. Sipas raportimeve mediatike, e ardhmja e 29-vjeçarit, kontrata e të cilit me gjermanët skadon në vitin 2028, mbetet në pikëpyetje, pasi ende nuk dihet nëse drejtuesit e Bayernit e shohin atë si pjesë kyçe të planeve të tyre afatgjata. Pavarësisht kësaj, futbollisti koreano-jugor duket se synon të vazhdojë aventurën e tij në Gjermani, klub ky që investoi plot 50 milionë euro për ta transferuar nga Napoli në verën e vitit 2023, ndërkohë që skuadra të tjera po monitorojnë situatën e tij nga afër. Çdo lëvizje e mundshme në merkato nuk pritet të ndodhë gjatë muajit janar, duke bërë që ky operacion të shtyhet për merkaton e verës së ardhshme, periudhë kjo që mund të sjellë zhvillime të reja. Megjithatë, rruga e Milanit drejt mbrojtësit, i cili në muajin nëntor do të mbushë 30 vjeç, nuk do të jetë e thjeshtë, pasi në garë për shërbimet e tij janë futur edhe skuadrat angleze Tottenham dhe Aston Villa. Edhe pse vetë lojtari do ta shihte me syrin e mirë një rikthim të mundshëm në Serie A, një transferim i tillë nga ana e Milanit mbetet i kushtëzuar nga strategjia e klubit italian, i cili mund të preferojë të mos kryejë investime të mëdha financiare për mbrojtjen gjatë merkatos së dimrit.