Operacioni i FBI-së që zbuloi vëllezërit nga Kosova: Si funksiononte platforma ilegale e të dhënave “Rydox”

Një rrjet ilegal online ku tregtoheshin emra, adresa, të dhëna bankare dhe kredenciale llogarish është shkatërruar pas një hetimi të gjerë nga Byroja Federale e Hetimit (FBI) e Shteteve të Bashkuara. Platforma e njohur si “Rydox”, e cila ka operuar për vite me radhë, drejtohej nga dy vëllezër nga Kosova, Ardit dhe Jetmir Kutleshi. Dokumentet zyrtare të gjykatave amerikane zbulojnë detaje se si ky treg i errët u shërbente blerësve me informacione të vjedhura për qëllime mashtrimi dhe krimesh kibernetike. Të dy vëllezërit kanë pranuar fajësinë para drejtësisë amerikane, ku Jetmir Kutleshi tashmë është dënuar, ndërsa Ardit Kutleshi pritet të ballafaqohet me vendimin përfundimtar për dënimin e tij në shkurt të vitit 2027. Fijet e hetimit u vunë lëvizje në nëntor të vitit 2022, kur një blerës i ri regjistroi një llogari në platformën “Rydox” dhe depozitoi kriptovaluta në vlerë prej 300 dollarësh amerikanë. Gjatë këtij operacioni në uebsajtin e paligjshëm, ai bleu rreth 40 paketa që përmbanin informacione të ndjeshme personale, duke përfshirë datëlindje, numra të sigurimeve shoqërore, patentë-shoferë, emra dhe adresa të personave të ndryshëm. Në realitet, ky blerës nuk ishte një klient i zakonshëm, por një agjent i fshehtë i FBI-së. Mes të dhënave të siguruara gjatë këtij operacioni ishin edhe informacionet e një qytetari nga Pensilvania, të cilit iu shit identiteti në mënyrë plotësisht të paligjshme dhe pa dijeninë e tij. Kjo blerje e kontrolluar shërbeu si gurthemel në hetimin amerikan që çoi drejtpërdrejt te identifikimi i vëllezërve Ardit dhe Jetmir Kutleshi si arkitektë dhe administratorë të këtij tregu digjital të paligjshëm. Dokumentet e gjykatave amerikane dëshmojnë se si strukturat e hetimit gjurmuan pagesat dhe komunikimet e brendshme mes drejtuesve të platformës. Edhe pse aksioni vendimtar i FBI-së u intensifikua në vitin 2022, aktiviteti i “Rydox” kishte nisur shumë më herët. Sipas dosjes hetimore, dy vëllezërit nga Kosova e menaxhonin këtë treg ilegal të paktën që nga shkurti i vitit 2016. Pas një periudhe ndërprerjeje mes viteve 2019-2020, platforma vazhdoi aktivitetin derisa u mbyll përfundimisht në fund të vitit 2024, si pasojë e operacionit të suksesshëm të agjencive ligjzbatuese amerikane. Gjatë vitit 2024, ndaj tyre u ngritën gjithsej gjashtë akuza penale. Jetmir Kutleshi pranoi fajësinë për akuzën e tretë lidhur me konspiracionin për transferimin, posedimin dhe përdorimin e mjeteve identifikuese. Ai u dënua gjatë vitit 2025, duke u llogaritur koha e kaluar në paraburgim prej rreth 12 muajsh, ndërsa pas shlyerjes së dënimit është parashikuar dëbimi i tij drejt Kosovës dhe ndalimi i hyrjes në SHBA. Nga ana e toje, vëllai i tij Arditi pranoi fajësinë në shtator të vitit 2026 për akuzën e parë dhe të gjashtë, që përfshijnë konspiracionin për pastrim parash dhe vjedhjen e rëndë të identitetit. Shpallja e masës ndëshkuese për të është caktuar të bëhet në fillim të vitit 2027. Në këtë rrjet të paligjshëm rezulton të jetë përfshirë edhe një shtetas tjetër nga Kosova, Shpend Sokoli, i cili u arrestua në Shqipëri si bashkëpunëtor i vëllezërve Kutleshi. Sipas raportimeve, ai u dënua në shkallë të parë në maj të vitit 2026 me 3 vjet e 8 muaj burgim. Përpjekjet për të marrë një deklaratë zyrtare apo koment nga mbrojtja ligjore e vëllezërve Kutleshi dhe nga vetë Jetmir Kutleshi mbetën pa përgjigje deri në momentin e publikimit të këtij artikulli. Sa i përket mënyrës se si funksiononte platforma, përdoruesit e interesuar duhej të hapnin një llogari përmes një adrese emaili dhe të kryenin depozita në kriptovaluta për të siguruar qasjen dhe blerjen e produkteve ilegale në këtë treg online.