Ftesa nga Prokuroria Speciale, Igor Simiq flet për dyshimet ndaj zyrtarëve të Listës Serbe

Nënkryetari i Listës Serbe, Igor Simiq, ka njoftuar se ai dhe disa figura të tjera të larta të këtij subjekti politik janë thirrur sërish për t'u marrë në pyetje nga Prokuroria Speciale. Sipas tij, ndaj tyre rëndojnë dyshime për përfshirje në disa vepra penale. Në deklaratën e tij, Simiq ka bërë të ditur se në dokumentin zyrtar të ftesës citohen akuza që lidhen me “sulm ndaj rendit kushtetues”, si dhe vepra të tjera të natyrës penale. Nëpërmjet një reagimi të bërë në platformat e mediave sociale, ai ka konfirmuar se do të paraqitet para autoriteteve të drejtësisë, duke hedhur poshtë çdo pretendim për shkelje ligjore. “Si gjithmonë, do t’i përgjigjem ftesës, sepse nuk kam çfarë të fsheh, i vetëdijshëm, ashtu si edhe ata që e kanë shkruar këtë, se nuk kam kryer asnjë vepër penale dhe se, si përfaqësues politik, e kam obligim të jem me popullin tim dhe të flas publikisht për vuajtjet e tij”, ka shkruar Simiq. Ndërkohë, institucionet e drejtësisë, përkatësisht Prokuroria Speciale, ende nuk kanë dalë me një njoftim zyrtar apo shpjegim për opinionin publik rreth këtij rasti dhe detajeve të hetimit ndaj zyrtarëve të Listës Serbe.