Kurti nga Parisi: Njohja nga Serbia është kyçe për të dyja palët, Kosova kërkon statusin e kandidatit në BE

Kryeministri i Kosovës, Albin Kurti, në një intervistë për mediumin francez “France 24”, ka shprehur pritshmëritë e tij se Kosova mund ta sigurojë statusin e vendit kandidat për anëtarësim në Bashkimin Evropian brenda një periudhe të shkurtër kohore. Kreu i ekzekutivit shfaqi zhgënjimin e tij për faktin se kanë kaluar katër vjet nga dorëzimi i aplikimit, ndërsa Kosova vazhdon të mbetet i vetmi shtet në kontinentin evropian pa këtë status. Ai theksoi se pengesa kryesore aktualisht qëndron te mungesa e një kërkese zyrtare nga Këshilli Evropian drejtuar Komisionit Evropian, e cila do të zhbllokonte hartimin e opinionit mbi kandidaturën e vendit. Kurti nënvizoi se institucionet e Kosovës kanë përmbushur standardet e kërkuara në fushën e sundimit të ligjit, demokracisë, luftës kundër korrupsionit dhe lirisë së medias. “Ne kemi realizuar të gjitha detyrat tona në përputhje me indekset demokratike dhe liberale”, deklaroi ai, duke shtuar se vendi nuk po kërkon trajtim preferencial, por një vlerësim të bazuar në merita. Sipas kryeministrit, Kosova është e përgatitur t’u përgjigjet të gjitha kritereve teknike dhe pyetësorëve të Komisionit Evropian. Megjithatë, ai pranoi se mosnjohja e pavarësisë së Kosovës nga pesë shtetet anëtare të BE-së – Spanja, Qiproja, Rumania, Greqia dhe Sllovakia – mbetet një sfidë e vazhdueshme, edhe pse ka shënuar zhvillime pozitive siç është vendimi i Spanjës për njohjen e pasaportave tona. Duke iu përgjigjur kritikave lidhur me sistemin gjyqësor, Kurti pranoi ekzistencën e sfidave, por sqaroi se reformat e ndërmarra, përfshirë themelimin e byrosë për konfiskimin e pasurisë së pajustifikueshme, synojnë forcimin e shtetit ligjor. Ai beson se procesi i integrimit do të shërbejë si një katalizator për përshpejtimin e këtyre ndryshimeve. Në lidhje me marrëdhëniet me Serbinë, Kurti ritheksoi se qëllimi strategjik i Prishtinës mbetet normalizimi i plotë i raporteve, ku njohja reciproke është thelbi i çdo zgjidhjeje. Ai porositi se sa më shpejt që Serbia të pranojë realitetin e pavarësisë së Kosovës, aq më shumë do të përfitojnë të dyja vendet në rrugën e tyre drejt stabilitetit dhe integrimit.