Debat i ashpër në BBVK 5: Arlinda shkakton polemika me qëndrimin e saj mbi fenë

Shtëpia e “Big Brother VIP Kosova 5” është përfshirë nga një diskutim i tensionuar, pasi banorja Arlinda ka bërë një deklaratë të fortë duke e cilësuar fenë si një formë politike. Ky konstatim i saj ka ndezur menjëherë debatin mes pjesëmarrësve të tjerë. I pari që ka reaguar ndaj kësaj deklarate ka qenë Fuego, i cili i ka rikujtuar Arlindës rregullat strikte të formatit. “Në kontratë është e shkruar qartë se nuk duhet të flitet për fenë”, ka theksuar ai gjatë shkëmbimit të mendimeve. Duke parë situatën e krijuar, moderatori Alaudin Hamiti ka ndërhyrë gjatë spektaklit për t'u dërguar një mesazh të prerë banorëve. Ai ka kërkuar nga të gjithë që besimi fetar të mos bëhet pjesë e debateve apo përplasjeve brenda shtëpisë më të famshme në vend. “Lëreni fenë anash, debatoni për çfarë të doni, por këtë lëreni anash. Kjo vlen për të gjithë, sepse nuk mundemi me pasë standarde të dyfishta rreth asaj çfarë besimi kemi, çfarë prezantojmë dhe çfarë themi”, ka deklaruar Hamiti, duke kërkuar respektimin e këtij parimi nga çdo banor.