Publikuar më: Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre. Një rast i tillë i dhunës në familje është raportuar më 4 korrik në fshatin Dobërllukë të Vushtrrisë, ku një grua ka përjetuar ofendime dhe presion psikologjik nga bashkëshorti i saj. Sinjali mëson se viktima, H.H, 35 vjeçare, ka raportuar në polici se rreth orës 11:00 i dyshuari A.H., 42 vjeçar, pasi ishte kthyer në shtëpi, e ka fyer rëndë dhe i ka shkaktuar gjendje të rënduar psikologjike. Pas raportimit, Prokurori Kujdestar ka udhëzuar që rasti të cilësohet si “Dhunë në familje”, ndërsa e dëmtuara është dërguar në qendrën strehimore për mbrojtje të mëtejme. I dyshuari është intervistuar në prani të organeve kompetente dhe më pas është liruar në procedurë të rregullt, ndërsa hetimet rreth rastit vazhdojnë.