Nisma për Gjykatën Speciale, Tahiri shpërthen ndaj qeverisë: Pse po zvarritet projektligji? Nuk është dokument i NASA-s

Deputeti i Aleancës për Ardhmërinë e Kosovës, Besnik Tahiri, ka ngritur shqetësime të forta ndaj institucioneve ekzekutive për mosdërgimin në Kuvend të projektligjit që parasheh ndryshimin dhe plotësimin e Ligjit për Dhomat e Specializuara. Nëpërmjet një reagimi publik në rrjetet sociale, ligjvënësi opozitar ka vënë në dukje praktikën e rrezikshme të lënies së çështjeve kyçe për momentet e fundit. Ai u shpreh se vetëm shtatë ditë para se Kuvendi të vendosë mbi fatin e mundshëm të zgjedhjeve të parakohshme, temat e rëndësisë jetike po trajtohen në 24-orëshin e fundit. “Shikojeni ku ka rënë kjo shoqëri nën këtë mënyrë qeverisjeje, gjithçka shtyhet, gjithçka lihet për fund, ndërsa institucionet funksionojnë vetëm nën presionin e krizës. Pse nuk kthehet Ligji në Kuvend nga Ministria e Drejtësisë? Ai Ligj nuk është ndonjë dokument analitik i NASA-s. Është ligj, me disa nene, që mund të diskutohet, ndryshohet dhe votohet. Pse kjo logjikë anti-shtetërore? Kujt po i lëmë ngile kështu?”, ka deklaruar ndër të tjera Tahiri. Në vijim të reagimit të tij, politikani opozitar ka hapur edhe çështjen e mungesës së një qasjeje serioze ndaj procesit të zgjedhjes së presidentit, duke kërkuar llogaridhënie dhe një shtet funksional. “Pse nuk flitet seriozisht për një shtet funksional dhe llogaridhënie? Sepse duket se qëllimi nuk është zgjidhja e krizave, por kalimi nga një krizë në tjetrën. Kjo nuk është qeverisje. Është shtyrje e vazhdueshme e problemit deri në minutën e fundit. Shteti nuk qeveriset në 24 orët e fundit”, ka përfunduar ai.