Kujdes drejtues automjetesh: Të dielën vendoset regjim i posaçëm qarkullimi në Shkup për shkak të garës atletike

Ministria e Punëve të Brendshme ka njoftuar se këtë të diel, më 27 shtator 2026, duke filluar nga ora 08:00, do të organizohet një garë vrapimi në rrugë nga Shoqata e Klubit të Atletikës "Maratona e Shkupit". Për mbarëvajtjen e këtij aktiviteti sportiv do të ndërmerren masa të posaçme për sigurinë dhe mbarëvajtjen e qarkullimit rrugor. Sipas njoftimit zyrtar, shtegu i garës do të nisë në rrugën "9" përpara Shtëpisë së Kulturës në komunën e Ilindenit, duke vazhduar përgjatë rrugës "534" në vendbanimin Ilinden dhe rrugës "532" në fshatin Marino. Më pas, garuesit do të kalojnë në rrugën "10" në fshatin Kadino, ku pranë rrethrrotullimit do të bëjnë kthesën gjysmërrethore për t'u kthyer sërish nëpër të njëjtat akse: rruga "10", rruga "532", rruga "534" dhe rruga "9". Gara do të vazhdojë tutje përgjatë rrugës "2" deri te Shtëpia e të Moshuarve, ku do të ketë edhe një kthesë tjetër gjysmërrethore për t'u drejtuar drejt vijës së finishit, e cila është vendosur para Shtëpisë së Kulturës në rrugën "9" në vendbanimin Ilinden. Për shkak të zhvillimit të këtij eventi, Njësia e Sigurisë në Trafikun Rrugor ka parashikuar marrjen e masave për vendosjen e një regjimi të veçantë qarkullimi, duke bërë të mundur ridrejtimin e automjeteve në akset alternative përreth. Në fund, MPB u bën thirrje publike të gjithë qytetarëve dhe drejtuesve të automjeteve që të tregojnë mirëkuptim dhe të respektojnë rreptësisht urdhrat dhe udhëzimet e dhëna nga efektivët e policisë përgjatë gjithë rrugëve ku do të kalojë gara sportive.