Në ditëlindjen e tij të 90-të, Milani nderoi me emocione të veçanta ish-presidentin legjendar Silvio Berlusconi

Klubi italian i Milanit ka zgjedhur një formë mjaft prekëse për të përkujtuar ish-numrin një të tij, Silvio Berlusconi, i cili sot do të festonte 90-vjetorin e lindjes. Përmes një postimi në rrjetet sociale, gjiganti kuqezi ka sjellë në vëmendje figurën e njohur që u nda nga jeta më 12 qershor 2023. “Silvio Berlusconi: një emër i përjetshëm i historisë sonë”, ka shkruar klubi në mesazhin dedikuar ish-liderit të tij, duke shoqëruar dedikimin me një fotografi emblematike. Bëhet fjalë për imazhin ku Berlusconi shfaqet duke ngritur lart Kupën e Kampionëve, trofe ky i fituar nga skuadra milaneze në maj të vitit 1990 në stadiumin “Prater” të Vjenës, pas triumfit ndaj Benfikës. Duke marrë drejtimin e klubit në vitin 1986 dhe duke e udhëhequr atë për plot 31 vite, Silvio Berlusconi u shndërrua në një shtyllë kryesore të lavdisë kuqezi. Nën presidencën e tij, Milani arriti të rrëmbente 29 trofe të ndryshëm, përfshirë 5 Kupa Evrope / Champions League, shifra këto që e kurorëzojnë atë si presidentin më të trofeshëm në historinë e ekipi nga Milano. Kujtimi i sotëm në 90-vjetorin e lindjes së tij përmbledh në mënyrë të përkryer epokën e artë të Milanit: imazhin e trofeut në duart e njeriut që udhëhoqi një nga periudhat më të suksesshme të futbollit evropian.