Tragjedi në Greqi: Ndërron jetë 16-vjeçari shqiptar Asllan Gjana pas përplasjes fatale në fushën e blertë

Një ngjarje e rëndë ka tronditur komunitetin shqiptar në Greqi dhe opinionin publik, pasi 16-vjeçari shqiptar Asllan Gjana ka humbur jetën tragjikisht gjatë një ndeshjeje futbolli. I riu pësoi një dëmtim të rëndë në kokë, i cili rezultoi fatal për jetën e tij. Ngjarja ndodhi në minutën e dytë të një takimi të vlefshëm për kategorinë e dytë të Shoqatës së Futbollit të Kavalës. Gjatë një dyluftimi për topin, adoleshenti doli jashtë kufijve të fushës dhe goditi fort pjesën e pasme të kokës në gardhin mbrojtës të stadiumit. Në vendngjarje i u dha menjëherë ndihma e parë mjekësore nga mjeku i pranishëm, por për shkak të gjendjes kritike, u vendos transportimi i tij urgjent drejt spitalit. Pavarësisht përpjekjeve maksimale dhe trajtimit në repartin e kujdesit intensiv të Spitalit të Kavalës, Gjana nuk mundi t'i mbijetojë plagëve të marra. Klubi dhe familja e tij sportive kanë reaguar me dhimbje të thellë përmes një mesazhi lamtumire, duke theksuar se skuadra ndodhet në zi dhe se kujtimi i Asllan Gjonit do të mbetet përgjithmonë i paharruar në zemrat e tyre.