Luis de la Fuente i jep fund thashethemeve: Ja pse Lamine Yamal nuk udhëtoi me Spanjën

Përzgjedhësi i kombëtares së Spanjës, Luis de la Fuente, ka reaguar ashpër ndaj spekulimeve të shumta rreth mungesës së Lamine Yamalit në përballjen ndaj Çekisë, e cila do të zhvillohet në Pragë. Tekniku spanjoll ka sqaruar se vendimi ishte tërësisht i natyrës mjekësore. Federata Spanjolle e Futbollit njoftoi se ylli i Barcelonës ka shfaqur shqetësime në gjurin e djathtë pas duelit të fundit kundër Atletico Madridit. Si rrjedhojë, është vendosur që futbollisti të mos jetë pjesë e ekspeditës në Pragë, por të vijojë procesin e rikuperimit në ambientet e klubit të tij në Barcelonë. De la Fuente shpjegoi se ky vendim erdhi pas një analize të detajuar mes stafit mjekësor të kombëtares dhe atij të klubit katalanas, në koordinim të plotë me vetë lojtarin. Bëhet fjalë për një inflamacion në gju që kërkon kujdes të shtuar. “Lamine vuan nga një inflamacion në gju. Pas kontrollit nga mjekët tanë, vendosa që ai të mos udhëtonte dhe të qëndronte për të ushtruar në klubin e tij. Është vërtet e trishtë dhe e mjerueshme të dëgjosh komente të bëra pa pasur njohuri për situatën reale”, deklaroi trajneri. Në përfundim, De la Fuente hodhi poshtë çdo aludim për trajtim preferencial ndaj talentit spanjoll. Ai nënvizoi se menaxhimi i kësaj situate është bërë me profesionalizëm dhe se rregullat janë të barabarta për të gjithë futbollistët e grumbulluar. “Lamine nuk gëzon asnjë lloj privilegji. Këtë masë do ta kishim marrë për çdo lojtar tjetër të grupit nëse do të ishte përballur me të njëjtin problem shëndetësor”, përfundoi përzgjedhësi spanjoll.