Gareth Bale thur elozhe për Luka Modriçin: Një legjendë që sfidon kohën

Ish-ylli uellsian, Gareth Bale, ka ndarë vlerësime të larta për ish-bashkëlojtarin e tij, Luka Modriç, përmes një video-mesazhi të publikuar nga organizata prestigjioze 'Laureus'. Bale, i cili ka ndarë shumë momente të karrierës me mesfushorin kroat, nuk nguroi ta krahasojë atë me verën e vjetër, që sa më shumë kalon koha, aq më shumë vlerë fiton. “Luka është si vera e cilësisë së lartë: sa më shumë vitet kalojnë, aq më i mirë bëhet. Kam luajtur më shumë ndeshje me të se me çdo futbollist tjetër. Është mbresëlënëse të shohësh nivelin e tij në stërvitje dhe se si arrin t'i përkthejë ato aftësi në ndeshje zyrtare. Pavarësisht moshës, vazhdimësia e tij në nivelet më të larta është një fenomen i rrallë”, u shpreh Bale. Uellsiani theksoi gjithashtu inteligjencën taktike dhe lëvizjet e kroatit në fushë. “Ndonëse nuk spikat për përmasat fizike, mënyra se si ai e kontrollon topin dhe si e drejton lojën është e pabesueshme. Kushdo që e ka pasur përballë apo krah për krah, e kupton vlerën e vërtetë të tij”, shtoi ai. Historia e dyshes nisi në vitin 2008 te Tottenhami, për t’u bashkuar sërish te Real Madridi, ku u shndërruan në protagonistë të një prej epokave më të arta të klubit mbretëror. Së bashku, ata ishin pjesë e suksesit historik me pesë trofe të Ligës së Kampionëve (2014, 2016, 2017, 2018 dhe 2022). Modriç, fitues i Topit të Artë në vitin 2018, e mbylli aventurën 13-vjeçare në Madrid me një rekord prej 28 trofesh. Ndërsa Gareth Bale i dha fund karrierës së tij si futbollist në janar të vitit 2023, pas një periudhe te Los Angeles FC, Luka Modriç vazhdon të mbetet aktiv në nivelet elitare. Pas largimit nga 'Santiago Bernabeu' në verën e vitit 2025, ku numëronte gjashtë trofe të Ligës së Kampionëve, kroati nisi një sfidë të re në futbollin italian, duke iu bashkuar radhëve të Milanit, ku vazhdon të shfaqë magjinë e tij në fushë.