Arman Durmishi rrëfen rrugëtimin te Juventusi: Mbështetja e vëllait dhe ndihma e shqiptarëve në Torino

Talenti 18-vjeçar shqiptar, Arman Durmishi, është shpallur “Talenti i Muajit” nga rubrika e njohur e Juventusit, “We Are Youth”. Kjo hapësirë në faqen zyrtare të klubit torinez i dedikohet yjeve në ngjitje të skuadrës “Next Gen” dhe akademisë, duke hedhur dritë mbi rrugëtimin e futbollistit që së fundmi ka qenë në qendër të vëmendjes për shkak të zhvillimeve lidhur me ftesat nga ekipet kombëtare. Durmishi, i cili është transferuar te Juventusi së bashku me vëllain e tij, Dajanin, nga klubi slloven Koper, ka ndarë detaje nga përshtatja e tij në Itali. Ai ka treguar se si përkrahja e familjes ka qenë shtylla kryesore e suksesit të tij, ndërsa ka shprehur mirënjohje për dy bashkatdhetarët e tij, Rafaele Huli dhe Kris Gecaj, të cilët e ndihmuan të kapërcente barrierat gjuhësore gjatë vitit të tij të parë në Torino. Duke folur për hapat e parë në futboll, Durmishi kujton pasionin e hershëm që e bëri të braktiste sportet e tjera si volejbollin apo hendbollin për t'iu përkushtuar topit të futbollit. “Goli im i parë në shi mbetet kujtimi më i bukur. Aty kuptova se fusha e blertë ishte vendi ku doja të ndërtoja jetën time”, shprehet ai. Për sa i përket stilit të lojës, 18-vjeçari e përshkruan veten si një sulmues që jeton për golin, duke renditur Lionel Mesin, Luis Suarezin dhe Zlatan Ibrahimoviçin si frymëzimet e tij kryesore. Përtej fushës, Durmishi shprehet i lumtur me jetën në Torino, qytet të cilin e vlerëson shumë, dhe thekson se infrastruktura e Juventusit i ofron gjithçka të nevojshme për t'u zhvilluar si profesionist. Sfidat e kalimit nga futbolli slloven te ai italian kanë qenë të mëdha, por mbështetja e vazhdueshme e vëllait dhe mjedisi bardhezi kanë ndikuar që ai të vazhdojë ëndrrën e tij për të luajtur në nivelet më të larta të futbollit evropian.