Vendimi ndaj Russell Brand: Një kthesë vendimtare dhe fitore e bujshme për të drejtat e grave

Shpallja fajtor dhe dënimi me 10 vjet e gjashtë muaj burg i Russell Brand – i cili u gjet përgjegjës për përdhunimin e një gruaje dhe sulmet seksuale ndaj tri të tjerave – ka shkaktuar valë reagimesh në opinionin publik, duke u cilësuar nga figura të njohura si një moment historik për drejtësinë dhe viktimat e dhunës. Helen Rumbelow, gazetare dhe shkrimtare e njohur, e ka vlerësuar këtë vendim gjyqësor si një triumf të madh për të gjitha ato gra që kanë pasur guximin të flasin hapur për abuzimet që kanë pësuar. Sipas saj, dëshmitaret kanë shënuar një fitore të rëndësishme në një betejë që për dekada të tëra ka mbetur e hapur dhe e pambyllur për shumë viktimat. Në një postim të shpërndarë në rrjetet sociale, Rumbelow vëren se muajt e fundit janë shoqëruar me një valë lajmesh rreth gjyqeve të bujshme për përdhunime dhe skandale të tjera seksuale. Pavarësisht një klime që mund të krijojë pasiguri, ajo thekson se tendenca është në rritje: gjithnjë e më shumë gra po gjejnë forcën për të dalë para drejtësisë. Gjatë analizës së saj, ajo u ndal edhe te dinamika e procesit gjyqësor, duke veçuar pyetjet e avokatit mbrojtës të Brand, Ian Winter, drejtuar dëshmitareve mbi arsyet e heshtjes së tyre të mëparshme. Rumbelow vuri n’ë dukje se këto pyetje nxjerrin në pah barrën e rëndë psikologjike dhe shoqërore që u faturohet padrejtësisht viktimave, ndërkohë që miliona gra të tjera nuk kanë arritur kurrë të gjejnë qetësi apo drejtësi. Në të njëjtin reagim, shkrimtarja solli në vëmendje një simbolikë krahasuese me monumentet e Ushtrit të Panjohur të ngritura pas Luftës së Parë Botërore, duke propozuar ngritjen e një memoriali të dedikuar posaçërisht grave që kanë rënë pre e dhunës seksuale, por që nuk patën kurrë mundësi të flisnin ose të fitonin drejtësinë e merituar. “Për të gjitha gratë e panjohura që kanë pësuar sulme seksuale, duhet të ngrihet një monument nderimi edhe për ju. Deri atëherë, mbetem e mahnitur nga guximi juaj,” u shpreh ajo. Një mesazh i fortë erdhi edhe nga ana e gjykatësit Joel Bennathan, i cili në përfundim të këtij procesi penal dha një paralajmërim të qartë mbi konceptin e pëlqimit dhe përgjegjësinë penale të autorëve. “Pavarësisht se çfarë veshin gratë, ku vendosin të shkojnë apo çfarë konsumojnë, ato ruajnë të drejtën e tyre të plotë për të thënë ‘jo’ dhe për të kërkuar llogaridhënie në gjykata kur individë si ju, Russell Brand, ndërmarrin veprime pa pëlqimin e tyre,” deklaroi ai. Kjo deklaratë riafirmoi një nga rregullat kryesore në trajtimin e krimeve seksuale: faji dhe përgjegjësia për mungesën e pëlqimit i takojnë ekskluzivisht autorit të aktit, dhe kurrë atij që e pëson atë. Për Rumbelow, rëndësia e këtij verdikti shtrihet përtej ndëshkimit të një figure publike. Ky vendim shërben si megafon për të gjitha ato zëra grash që për vite me radhë janë heshtur nga frika, stigma apo mungesa e mbështetjes institucionale.