Nisma e re ligjore: Kërkohet pension proporcional për qytetarët me më pak se 15 vite kontribute

Parlamenti i Kosovës mund të përballet sërish me një ndryshim të rëndësishëm në legjislacionin e skemave pensionale, pasi deputetja e Aleancës, Teuta Haxhiu, ka ndërmarrë një iniciativë të re për të mbështetur një kategori të anashkaluar qytetarësh. Gjatë një konference për media të mbajtur të martën, ajo ka zyrtarizuar propozimin për amandamentimin e Ligjit për Skemat Pensionale të Financuara nga Shteti, duke synuar që të drejtën për pension ta fitojnë edhe ata persona që kanë kontribuar para vitit 1999, por që nuk arrijnë të plotësojnë kushtin prej 15 vitesh stazh pune. Sipas ligjvënëses, në terren ekziston një numër i madh qytetarësh të cilët, pavarësisht përvojës së gjatë profesionale, mbeten jashtë skemës së pensionit kontributpagues vetëm për shkak të kritereve strikte kohore. Ajo theksoi se shpeshherë bëhet fjalë për individë të cilëve u mungojnë vetëm pak vite, muaj apo edhe ditë nga periudha e kërkuar ligjore prej një dekade e gjysmë. Duke arsyetuar këtë hap, Haxhiu u shpreh se ky projektligj synon drejtësi sociale për kontributbaguesit e dikurshëm. "Ky propozim ka vetëm një qëllim, të fitojnë pension kontributpaguesit dhe qytetarët që kanë paguar kontribute, por nuk kanë plotësuar periudhën e nevojshme për të hyrë në skemat pensionale. Pra, bëhet fjalë për njerëzit që kanë punuar dhe paguar kontribute para janarit 1999", u shpreh ajo, duke sjellë shembuj konkretë të qytetarëve me mbi katër dekada përvojë pune të dëshmuar, të cilët kanë nisur punën që nga viti 1982 dhe sot mbeten pa përfitimet e merituara. Për t'i dhënë fund kësaj padrejtësie, Haxhiu ka sugjeruar që pagesa e pensionit të bëhet në përpjesësim të drejtpërdrejtë me vitet e kontubeve të derdhura. Ajo bëri të ditur se kjo përfaqëson nismën e tretë personale që ajo e ka proceduar për këtë çështje qysh nga viti 2015, krahas një nisme tjetër të përcjellë përmes një ish-kolegu, duke e çuar në katër numrin e përpjekjeve të deritanishme nga grupi i saj parlamentar. Duke insistuar në nevojën e një konsensusi shoqëror dhe institucional, deputetja shtoi se institucionet duhet të reflektojnë. "Duhet të gjendet një zgjidhje si shoqëri, si deputetë dhe si Kuvend. Nëse një person nuk e plotëson periudhën për pension sipas kushteve aktuale, ai duhet të ketë mundësi të marrë një pension në përpjesëtim me kontributet që ka paguar", deklaroi ajo para gazetarëve. Gjatë paraqitjes së saj, Haxhiu ofroi edhe skenarin se si do të funksiononte formula matematikore e përllogaritjes së këtij pensioni proporcional për personat që nuk arrijnë pragun e 15 viteve. Ajo ilustroi këtë model përmes një llogaritjeje praktike: "Nëse pensioni i plotë i kontributpaguesit të kategorisë përkatëse do të ishte 300 euro në muaj, këtë shumë e pjesëtojmë me 15 dhe rezultati është 20 euro në muaj për çdo vit kontribute. Nëse një qytetar ka 14 vite kontribute, do të përfitojë 280 euro në muaj. Një qytetar me 14 vite e 6 muaj kontribute do të përfitojë 290 euro në muaj. Llogaritet çdo muaj, çdo ditë që qytetarët kanë kontribute", përfundoi ajo.