Incident i rëndë në SHBA: Dy avionë rrezikojnë përplasjen në ajër mbi Los Angeles

Institucionet kompetente në Shtetet e Bashkuara të Amerikës kanë hapur një hetim zyrtar pas një incidenti të rrezikshëm ajror, ku dy aeroplanë i kanë shpëtuar për pak një përplasjeje fatale menjëherë pas nisjes nga Aeroporti Ndërkombëtar i Los Angelesit (LAX). Ngjarja dramatike është regjistruar mbrëmjen e të shtunës, rreth orës 00:20. Sipas të dhënave nga Administrata Federale e Aviacionit (FAA), fluturimi 28 i kompanisë Air France kreu një manovër të papritur dhe “të paautorizuar” pasi u shkëput nga pista e aeroportit. Ky veprim bëri që mjeti fluturues të devijonte drejt korridorit ajror të një avioni tjetër, i cili sapo ishte ngritur prej një piste paralele. Falë ndërhyrjes urgjente të kontrollorëve të trafikut ajror, të cilët monitoruan situatën përmes sistemeve të tyre, u evitua më e keqja. Regjistrimet audio dëshmojnë se kontrollorët urdhëruan menjëherë ekuipazhin e Air France të kthehej djathtas për të korrigjuar drejtimin. Në të njëjtën kohë, pilotëve të fluturimit 1660 të American Airlines, me destinacion Dallasin, iu dha urdhër i menjëhershëm për të humbur lartësi, me qëllim krijimin e hapësirës së sigurisë dhe shmangien e një katastrofe. Pavarësisht thirrjeve të përsëritura nga ana e kullës së kontrollit për të kuptuar arsyet e këtij devijimi të pashpjeguar, pilotët e Air France nuk dhanë një sqarim konkret për afro 20 minuta rresht. “Më duhet një përgjigje. Cila ishte trajektorja e ngritjes që ju udhëzoi të ndiqnit kulla e kontrollit?”, dëgjohet qartë në audio duke pyetur një prej kontrollorëve drejt kabinës së Air France. Ndërkohë, autoritetet e aviacionit e kanë cilësuar ngjarjen si një “devijim të mundshëm nga udhëzimet e pilotit”, ndërsa hetimet e thelluara janë duke vijuar për të zbardhur shkaqet e plota të këtij incidenti tronditës.