Koha e Neuerit drejt fundit: Gjiganti bavarez nis kërkimin për portierin e ri

Klubi i njohur gjerman, Bayern Munich, thuhet se ka përgatitur një listë të ngushtë me tre kandidatë potencialë për të pasuar Manuel Neuerin, pasi portieri veteran po shkon drejt mbylljes së karrierës së tij të bujshme në përfundim të këtij edicioni. Edhe pse 40-vjeçari ende nuk e ka zyrtarizuar largimin nga fushat e blerta, burime mediatike nga Gjermania bëjnë me dije se problemet fizike dhe lëndimi në këmbë mund të ndikojnë në vendimin përfundimtar të tij për të varur dorezat në gozhdë. I vlerësuar gjerësisht si një ndër portierët më të Mëdhenj në histori të futbollit, largimi i Neuerit pritet të lërë një hapësirë të ndjeshme te gjiganti nga Munichu, duke detyruar drejtuesit të planifikojnë lëvizjet e ardhshme. Sipas informacioneve të siguruara nga gazetari Florian Plettenberg, drejtuesit bavarezë e shikojnë Jonas Urbigun si zgjedhjen ideale për të marrë fanellën e titullarit në portë, por njëkohësisht synojnë të afrojnë edhe një gardian me përvojë ndërkombëtare për të krijuar siguri si alternativë e dytë. Për këtë pozicion, në planet e klubit gjerman janë përfshirë emra të njohur si Oliver Baumann i Hoffenheimit, Bernd Leno që luan te Fulhami, si dhe ish-portieri i Liverpoolit, Loris Karius. Struktura drejtuese e klubit do të analizojë me kujdes të gjitha alternativat gjatë muajve në vijim, me qëllim që tranzicioni pas epokës Neuer të realizohet në mënyrën më të suksesshme të mundshme për skuadrën.