Goditje në merkato: PSG refuzon përfundimisht kërkesën e Luis Enriques për talentin e Leverkusenit

Paris Saint-Germain ka marrë vendimin përfundimtar për të hequr dorë nga transferimi i mesfushorit sulmues algjerian, Ibrahim Maza, 20-vjeçarit të Bayer Leverkusen, gjatë afatit kalimtar dimëror të vitit 2027. Kjo lëvizje nxjerr përfundimisht nga gara një nga opsionet kryesore për të mbuluar mungesën e Kvicha Kvaratskheliah, i cili do të mungojë deri në fund të sezonit për shkak dëmtimi. Sipas gazetarit Sasha Tavolieri, drejtuesi i departamentit sportiv në klubin francez, Luis Campos, ka vendosur të ndërpresë çdo formë komunikimi. Ky vendim erdhi pasi ai refuzoi kategorikisht metodat e përdorura nga rrethi i lojtarit dhe drejtuesit gjermanë, të cilat u panë si përpjekje për të detyruar nisjen e bisedimeve. Në këtë mënyrë, kampionët e Francës detyrohen të kërkojnë alternativa të reja në treg për të përforcuar repartin e sulmit, duke përmbushur kështu kërkesën parësore të trajnerit Luis Enrique për të shtuar cilësi në skuadër me synimin e qartë për të triumfuar në Ligën e Kampionëve. Përpjekja për të ringjallur kontaktet erdhi si nismë e përbashkët e babait të Ibrahim Mazës dhe klubit të Bayer Leverkusen, të cilët shfrytëzuan agjencinë e përfaqësimit Stellar për të testuar terrenin te drejtuesit parizienë mbi seriozitetin e interesimit të tyre. Megjithatë, kjo qasje u kundërshtua rreptësisht nga Luis Campos. Ai vlerësoi se mënyra e zgjedhur për të vepruar binte në kundërshtim të plotë me standardet dhe protokollet e miratuara të PSG-së për çështjet e transferimeve. Pas ndërprerjes së menjëhershme të kontakteve, Campos i bëri të qartë palëve të interesuara se çështja e mesfushorit sulmues është e mbyllur dhe nuk përbën më asnjë lloj prioriteti. Ndërkohë, parizienët po vlerësojnë pista të tjera, si Ez Abde i Real Betis, ndërsa në qarkullim janë shfaqur edhe zëra që i lidhin ata me anësorin e Real Madridit, Brahim Diaz. Nga ana e tij, menaxhmenti i PSG-së këmbëngul se klubi nuk ka ndërmarrë asnjë hap zyrtar për të nisur negociatat për Mazën. Sipas tyre, kontakti i parë ka ardhur si përgjigje ndaj një kërkese paraprake, ku babai i futbollistit kishte shprehur vullnetin për një takim në Paris. Përfshirja e një numri të madh ndërmjetësish mes familjes së lojtarit, drejtuesve të Leverkusenit dhe agjentëve të agjencisë Stellar krijoi një divergjencë që bllokoi çdo mundësi marrëveshjeje, duke mos lejuar madje as hapjen e bisedimeve në rrafshin financiar. Me tërheqjen përfundimtare të gjigantit francez, Bayer Leverkusen do të duhet të vendosë gjatë javëve në vijim nëse do ta mbajë Ibrahim Mazën në organikë deri në përfundim të sezonit 2026/27, apo do të nisë bisedimet me skuendra të tjera evropiane që janë të gatshme të pranojnë kushtet e ndërmjetësimit të refuzuara prerazi nga PSG-ja.