Koreja e Veriut forcon arsenalin detar: Testohet arma e re që pritet të hyjë në shërbim për 2027-ën

Koreja e Veriut ka ndërmarrë një hap të ri në fuqizimin e kapaciteteve të saj ushtarake, duke realizuar prova të suksesshme me një lloj të avancuar torpedosh. Ky zhvillim vjen në një kohë kur Pheniani po intensifikon ndjeshëm aktivitetin e tij ushtarak, duke ndjekur një agjendë të ngjeshur testimesh. Sipas njoftimeve zyrtare të bëra të hënën, ky testim ka shërbyer për të konfirmuar performancën luftarake të një sistemi të ri torpedosh me shpejtësi të lartë. Autoritetet koreano-veriore kanë bërë të ditur se kjo teknologji, e cila parashikohet të pajisë flotën detare duke filluar nga viti 2027, përfaqëson një përparim të rëndësishëm në modernizimin e marinës. Kujtojmë se që nga mesi i muajit tetor, Pheniani ka ndarë detaje për zhvillimin e një torpedoje precize, e cila shfrytëzon inteligjencën artificiale për identifikimin dhe goditjen e objektivave me saktësi të lartë. Ky është vetëm një nga seritë e shumta të provave të armatimeve, që përfshijnë gjithashtu raketa dhe dronë, të cilat janë testuar me një ritëm të pandërprerë javët e fundit. Modernizimi i forcave detare mbetet një nga prioritetet kryesore të udhëheqësit Kim Jong Un. Në kuadër të kësaj strategjie, vendi ka vënë tashmë në ujë dy shkatërrues të rinj me peshë 5,000 tonë gjatë vitit 2025, ndërsa synimet afatgjata përfshijnë blerjen ose prodhimin e anijeve të klasit 10,000 tonësh.