Triumf mes tensionit dhe kontestimeve në “Selman Stërmasi”, Tirana siguron fitoren ndaj Teutës

Përballja mes Tiranës dhe Teutës në stadiumin “Selman Stërmasi” ka dhuruar emocione të forta, fitore të rëndësishme për bardheblutë, por edhe momente të tensionuara, protesta ndaj gjykimit dhe skena interesante prapa kuintave të këtij dueli kampionati. Përgatitjet e fushës kanë vazhduar deri në sekondat e fundit para vërshëllimës së parë, ku punonjësit janë munduar të korrin barin, ndonëse gjendja dhe gjatësia e tij nuk ishin në parametrat optimalë. Në tribuna ishin të pranishëm rreth 1500 spektatorë, të cilët megjithatë nuk patën mbështetjen e zakonshme të grupit të njohur “Tirona Fanatics”. Ndërkohë, lojtarët e pezulluar Përgjoni dhe Krymi e kanë ndjekur ndeshjen nga shkallët e stadiumit, ndërsa në tribunën VIP është shfaqur edhe figura e njohur Agustin Kola, i ulur krah krerëve të dy klubeve. Ndeshja u shoqërua me momente të ndryshme tensioni në fushë dhe jashtë saj. Trajneri Dean Klafuriç ka shpërthyer në protesta të ashpra ndaj vendimeve të gjyqtarit Klodian Prenga, duke iu drejtuar me tone kritike arbitrit të katërt me fjalët: “Can you tell, zero card”. Edhe tifozët e pranishëm shprehën hapur pakënaqësinë e tyre ndaj arbitrimit. Gjatë lojës, lojtari Umejiego pësoi një dëmtim që kërkoi ndërhyrjen e stafit mjekësor, duke e detyruar të qëndronte për një minutë jashtë vijave të fushës, ndërsa në fund shpërtheu festa e zjarrtë e përkrahësve pas golit të fitores. Në mbyllje të takimit, atmosfera u qetësua me disa momente humori gjatë prononcimeve për media. Teksa lojtari Daci po jepte intervistën e tij, rekani i skuadrës Xhixha ka ndërhyrë me një batutë të lezetshme, duke i kujtuar gazetarëve: “Mos harro asist i Xhixhës”, duke mbyllur kështu një mbrëmje plot ngjarje në kryeqytet.